Муус устар 29 күнүгэр, Үҥкүү аан дойдутааҕы күнүгэр, Опера уонна Балет тыйаатырын сыанатыгар киэһэ 17-00 чаастан «Принцесса Луны» диэн композитор Шандор Каллош «Такэтори-моногатари» дьоппуон омук остуоруйатынан суруйбут балетын Николай Боярчиков (Санкт-Петербург) хореографиятыгар уонна туруоруутугар көрдөрүөхтэрэ.
Манна Такэтори (“бамбук хомуйааччы” диэн суолталаах) кырдьаҕас бамбук умнаһыттан кырачаан кыысчааны булан ылан ииттэрин туһунан кэпсэнэр. Оҕонньор кыысчааҥҥа Кагуя-химэ диэн ааты биэрэр. Кинини төрөөбүт дойдутуттан – Ый саарыстыбатыттан – урукку олоҕор кыракый аньыыны оҥорбутун иһин Орто дойдуга үүрбүттэр. Такэтори ол туһунан сэрэйээхтээбэт даҕаны уонна кыыһын хайа табылларынан үчүгэй киһиэхэ ойох биэрэр туһунан саныыр. Кэрэ бэйэлээх кыыс биллэр-көстөр уолаттары сирэр уонна Микадоҕа эрэ истиҥ иэйиини иитиэхтиир. Ол эрэн, кинилэр бииргэ буолар аналлара суох...
«Принцесса Луны» испэктээк – улахан дьоҥҥо киһи-киһиэхэ сыһыанын, аан дойду кубулҕаттарын туһунан санаалары саҕар. Онтон улаатан эрэр оҕолорго үүнэн эрэ көлүөнэни хаһан баҕарар долгутар таптал, бэриниилээх буолуу, сирдээҕи иэйии туһунан кэпсиир.
Испэктээккэ кытталлар – Елена Посельская (бастакы толоруу) (Принцесса Луны), А.Деляев (Микадо), Сайнаара Иванова (бамбуктаах чараҥ феята), Михаил Дмитриев (Такэтори кырдьаҕас). Вокал партията – СӨ үтүөлээх артыыһа Феодосия Шахурдина. Дирижер – аан дойдутааҕы куонкурус лауреата Николай Пикутскай.
