Ил Дархаммыт Айсен Николаев бүгүн, балаҕан ыйын 8 күнүгэр, Дьокуускай куора дууматын сиэссийэтин кэмигэр киин куораппыт 2032 сылга диэри сайдыытын тосхолун бигэргэтэр ыйаахха илии баттаата.
"Дьокуускайбытыгар Саха сирин олохтооҕун үс гыммыт биириттэн тахса киһитэ олорор. Куораппыт тупсаҕай, куттала суох, дьоллоох уонна уйгулаах олоҕу уһансар дьонунан туолуута - биһиги сүрүн сорукпут", - диэтэ Айсен Николаев. Кини Дьокуускай 400 сылын көрсө аан дойдуга ирбэт тоҥҥо тутуллубут саамай үчүгэй, тупсаҕай, кырасыабай куоракка кубулуйуохтааҕын эттэ. Айсен Сергеевич "бүгүҥҥү ыйаах киин куораппыт 2032 сылга диэри сайдарыгар туһуламмыт. Куорат дьаһалтатын кытары инфраструктура сайдыытыгар, уопсастыбаннай тырааныспар тиһигэ барыларыгар табыгастаах буоларыгар уонна куорат олохтоохторо уйгулара улаатарыгар төһүү буолуоҕар саарбахтаабаппын", - диэтэ.
Маны таһынан, Ил Дархан Ил Түмэҥҥэ киин куорат ыстаатыһын туһунан сокуон барылын киллэрбит.
