Мээрийэ саайтын иһитиннэриилэригэр сигэннэхпинэ, алмаастаах куорат былаастара олохтоохтортон түөрт уоҥҥа тиийэ биир хостоох уонна уонтан тахса икки хостоох кыбартыыралары атыылаһаллар.
Бу дьиэлэр тутуллубут кэмнэриттэн ылата 50 сылларын ааһа көөрөттүбүт (саахалланар туруктаах) буолуо суохтаахтар.
Ол аата «Изношенность свыше 50 процентов» буолбут дьиэлээхтэр манна санамматтар. Ону кыбартыыраҕытын атыылыыр дьоннор болҕойуҥ уонна Мииринэй куорат муниципальнай тэриллиитин иһитиннэриилэрин кыраҕытык кэтээҥ. Кыбартыыралары атыы-тутуу сокуон-быраап иитинэн электроннай былаһааккаларга ыытыллар. Манна даҕатан Мииринэй куоратыгар дьиэ-уот боппуруоһа хайдах турарын олохтоох киһи быһыытынан сырдатыым.
Ханна барытыгар дьиэ-уот – тыын боппуруос.
2017 сылтан ылата Мииринэй куоратыгар атыылаhааччы ахсаана букатын кыра. Ордук интэриэһи тардар 2 хостоох КПД таас дьиэ – үс мөлүйүөнтэн ордубат. Мантан үрдүктүк “хамсаабат баайдарын” батара сатыыр дьонтон атыылаһа охсорго дьулуспаттар. Мииринэй куорат социальнай ситимнэригэр, Интернет араас контеннарыгар уонна олохтоох хаһыат биллэриилэригэр атыылааччы, “хамсаабат баайын” туох да алдьархайдаах ыарахан сыанаҕа сыҥалыыр. Бу - атыылааччы тус бэйэтин баҕа санаата эрэ. Дьыалатыгар “торгууйдаһыахха” сөп. Мииринэйгэ билигин таас дьиэни чэпчэки сыанаҕа атыылаһарга тоҕоостоох кэм. Бу хаһааҥҥа диэри буолара биллибэт.
Мииринэйтэн соҕуруу көһөөрү сорунар дьон дьиэлэрин ыарахан сыанаҕа атыылаары өр да өр бириэмэ күүтээччилэр. Сылы-сылынан хаһыакка, информационнай саайтарга биллэрии үөһэ биллэрии биэрэллэр. Күн бүгүн, Мииринэй куоратыгар 500-чэ кыбартыыра уонна чааһынай дьиэ атыыга бара сатыыр. Аны дьэ кэлэн манна риэлтордар үксээн эрэллэр. Сорохтор өҥөлөрүн иһин үгүөрү суумманы көрдүүллэр.
Урут, саха улуустарыттан кэлэр итэҕэйимтиэ-кэнэн дьоҥҥо кыбартыыралары олус ыарахан сыанаҕа батарталыыр этилэр. Билигин дьэ талар, сыымайдыыр буоллулар. Икки этээстээх мас дьиэлэргэ ыксаабыт ханна да барар сирдэрэ суох дьон саантыыллар. Мииринэйгэ икки хостоох мас дьиэҕэ кыбартыыра атыылаһарга сорунар дьоҥҥо, сэрэтиэм этэ. Бу дьиэлэр үгүстэрэ хаарбах туруктаахтар. Мииринэй эргэ мас дьиэлэрин аҕыс уон бырыhыана, “хара муосталарыттан”, сытыйа-ымыйа, көөрөттө тураллар. Сорохторо, доруобуйаҕа буортулаах феноллаахтар. Балары, эрэй эрдэтинэ, ылбатах ордук. Талар, сыымайдыыр-түhэрсиhэр ордук. Тутуу ончу барбатынан сибээстээн, Мииринэйгэ дьиэ сыаната сотору хаттаан үрдүөн да сөп.
Балаһыанньа ситинник.
Станислав Алексеев. Мииринэй куорат. Слава Gelio Степанов хаартыската.
