Кулун тутар 25 күнүгэр Дьокуускайтан былыргы Лаамы суолунан (Охотскай тракт) икки “Бурлак” вездеходунан барбыт СӨ Ил Дарханын сүбэһитэ Георгий Никонов салайааччылаах “Улуу ситиһиилэр суолларынан” бырайыак эспэдииссийэтэ муус устар 1 күнүгэр Хабаровскай кыраай Охотскай куоратыгар тиийбит.
Барыта 1200 км, үксэ иччитэх, суола суох сиринэн айаннаабыттар. Охотскай оройуон сиригэр тиийэн, ыт мунна баппат ыккыйдаах ойуурунан, киһи саҕа халыҥ хаары хайытан айаннаан, былааннаабыттарыттан икки хонук тардыллыбыттар. Эспэдииссийэ бүгүн төттөрү айаннаабыт. Ол туһунан “ХКС” информааҕыныстыба биллэрэр. Онно тахсыбыт суруналыыс Утум Захаров фотолара туһанылыннылар.
Санаттахха: бу суолу XVII үйэҕэ Чуумпу акыйаан кытылыгар Арассыыйа бастакы форпоһугар Охотскайга тиийэргэ анаан арыйбыттара. Биллиилээх айанньыт Витус Беринг Хамчааккаҕа эспэдииссийэтин үс сыл Дьокуускайга бэлэмнээбитэ. Онтон ситэн-хотон, Охотскайтан 1725–1730 уонна 1733–1741 сс. икки улуу эспэдииссийэни оҥорбута. Кини Аляскаҕа тиийэ барбыта, Беринг силбэһиитин, элбэх арыылары арыйбыта. Ол уу суолунан Эмиэрикэҕэ илдьиллибит саха сүөһүтүн удьуора билигин даҕаны Аляскаҕа Чириков арыытыгар ол кэмнэр тыыннаах туоһулара буола сылдьарын омук генетик учуонайдара бигэргэппиттэрэ. Ол туһунан “Кыым” хаста да суруйан турар.
Владимир Степанов.
