Бүгүн, от ыйын 26 күнүгэр аатырбыт Париж куоракка XXXIII Сайыҥҥы олимпийскэй оонньуулар саҕаланыахтара. Манна 206 дойдуттан 10 тыһыынчаттан тахса успуорт чулуута 32 көрүҥҥэ 329 мэтээл кэмпилиэгин ылар туһугар илин былдьаһыахтара.
Олимпиадаҕа үгэс курдук саха тустуутун оскуолатын бэрэстэбиитэллэрэ кыттыахтара. Сааҥсыйанан сибээстээн, кинилэр атын дойду аатын көмүскүөхтэрэ. Ол курдук, Айаал Лазарев (125 кг) Олимпиадаҕа үһүс төгүлүн Кыргызстан аатыттан кыттыаҕа. Виктор Рассадин (74 кг) - Таджикистан, Георгий Окороков (65 кг) - Австралия уонна Владимир Егоров (57 кг) - Македония аатыттан олохторугар бастакытын кыттыахтара. Тустууга киирсиилэр атырдьах ыйын 8-11 күннэригэр ыытыллыахтара. Сүүрүүк кыыспыт Сардана Трофимова Кыргызстан аатыттан кыттыаҕа. Кини атырдьах 11 күнүгэр 42 км уһуннаах марафоҥҥа сүүрүөҕэ.
Олимпийскэй оонньуулары үөрүүлээхтик арыйыы Москуба бириэмэтинэн 20:30 саҕаланыаҕа, ол эбэтэр Саха сиригэр түүн 02.30 чааска. Быһа биэриини бу сигэнэн киирэн көрүөххүтүн сөп https://www.youtube.com/live/ORc-9zzqB3k?si=qJ_CsGbjmIbNLlU6
Хаартыска: "Триумф" успуорт киинэ, https://olympics.com/ саайт
