Соторутааҕыта куйаар ситиминэн биллиилээх ырыаһыт, урбаанньыт Анатолий Бурнашев тэрийбит «Күнтэгил» уһуйаанын отут күҥҥэ саппыттарын туһунан сонун киэҥник тарҕаммыта. Итинник быһаарыыны Дьокуускай куорат суута таһаарбыт буолан, дьон ортотугар араас толкуй үөскээтэ. Олор истэригэр «Соруйан харгыстыыллар» диэх курдук санаалар эмиэ бааллара. Дьыала ис дьиҥин билээри, Анатолий Аркадьевиһы сирэй көрсөн кэпсэттибит.
- Уһуйаан дьиэтин тоҕо саптылар? Көстүбүт кэһиилэр төһө оруннаахтарый?
- Ирдэбил аата ирдэбил. Төһө да чааһынай үөрэх кыһатыгар сөбө суоҕун иһин, тутуһарбытыгар тиийэбит. Ол элбэх үбү, бириэмэни уонна күүһү эрэйэр,. Уонна ити суукка биһиги кыттыбатахпыт, онон мөккүһэн саҥаттан көрүүгэ ыытаары сылдьабыт.
- Уһуйаан үлэтэ төһө харгыстанна?
- Уһуйааммыт биэс филиаллаах. Сайын устата үлэлииллэр. Арай хайатыгар эмэ өрөмүөн ыытар буоллахпытына, оҕолору атын дьиэҕэ көһөрөн биэрээччибит. Ол сиэринэн Бекетов уулуссатыгар турар дьиэбит сабыллан турбута. Бу кэмҥэ баһаар өттүнэн уочараттаах бэрэбиэркэ буолан ааспыта. Саҥа ирдэбили толорон хочуолунайын 12 м тэйиччи көһөрөн тута сылдьабыт. Дьиҥэр, 2017 сыллаахха, саҥа арыйарбыт саҕана, бары ирдэбилгэ сөп түбэһэр этэ. Онон, сайын устата барыта түөрт хочуолунайы туттара сылдьабын. Күһүн бүтэрэн үлэҕэ киллэриэхпит. Ити курдук баһаар өттүнэн сэрэтии ирдэбилин толоруу бара турар.
- Саҥа ирдэбил хаһан киирбитэй?
- 2022 сылтан чааһынай үөрэх тэрилтэлэриттэн судаарыстыбыннай тэрилтэлэртэн курдук ирдиир буолбуттара. Маны соччо сөпсөспөппүн. Туспа тосхолунан үлэлиирим быһыытынан, судаарыстыбаттан үбүлэнэр, сүүһүнэн үлэһиттээх, тыһыынчанан оҕолоох, судаарыстыбаннай үөрэх кыһатыгар турар ирдэбил чааһынай үөрэх кыһатыгар сөбө суох диэн өссө төгүл этэбин. Тэрилтэм кэнсиэпсийэтинэн оҕолору мас дьиэҕэ сырытыннарыыны, тэлгэһэҕэ хаарга оонньотууну туһалааҕынан ааҕар буоллахпына, толоро сатыырым өйдөнөр.
- Сорох дьон уһуйааны сабыыны анаан харгыстааһын курдук сыаналыыллар. Манна туох диэн хоруйдуугун?
- Баһаары сэрэтии ирдэбилэ баар, ону күн бүгүн тутуһар буоллахпыт. Уопсайынан, туспа көрүүлээх, туспа суоллаах-иистээх үлэни тэрийии хаһан баҕарар уустуктардаах диэхпин баҕарабын. Оннооҕор судаарыстыбаннай оскуолалар, оҕолоро баппакка, араас дьиэни-уоту атыылаһан оҥосторго күһэллэллэр. Биһиги эмиэ ол курдук дьаһанан тэриннэхпит дии. Бэрэбиэркэни ааһыы, ирдэбили толоруу – үлэбит сорҕото эбээт. Онон киһи айманара суох.
- Анатолий, быһааран биэрбиккэр махтал. Сахалыы эйгэлээх иитиини-үөрэтиини тэрийэр үгүс түбүктээх үлэҕэр ситиһиини, кыайыыны-хотууну баҕарабын.
Бэйэ кэр.
