13 АНАЛ ААККА КЫАЙЫЫЛААХТАРЫ БЫҺААРДЫЛАР
Орто Ботуобуйатааҕы ньиэп-гаас конденсаттаах сиргэ “Идэтигэр бастыҥ” көрүү-күрэх локальнай түһүмэҕин 11 кыайыылааҕын наҕараадалаатылар. Күрэх быйыл үбүлүөйдээх онус сылын тэрилиннэ.
Дьүүллүүр сүбэ күрэххэ кыттыбыт 74 үлэһити сыаналаата. Манна үлэ идэлэрин исписэлиистэрэ (ньиэби, гааһы хостуур эпэрээтэр, табаар эпэрээтэрэ, технологическай тэриллэр массыньыыстара уо.д.а.) кытыннылар.
Кыайыыга туруулаһар хас биирдии кыттааччыны хас да суол анал киритиэрийинэн сыаналаатылар. Ол иһигэр бырамыысыланнас, баһаарынай уонна экология өттүнэн куттала суох буолууга билиилэрин тургуттулар, үлэ харыстабылын быраабыларын барытын тутуһалларын көрдүлэр.
Көрүү-күрэх үөрүүлээх аһыллыытыгар тэрийэр кэмитиэт бэрэссэдээтэлэ, генеральнай дириэктэри бастакы солбуйааччы Артем Демочкин эҕэрдэ тыл эттэ, кыттааччылар күрэх бары тургутууларын эрэллээх ааһалларыгар, идэлэригэр уһулуччу бэлэмнээхтэрин көрдөрөллөрүгэр баҕарда.
Көрүү-күрэх хас биирдии анал аатыгар кыайыылаахтары бары өттүнэн сыаналаан быһаараллар. Күрэх икки чаастаах. Бастакы чааһыгар кыттааччылар идэлэригэр билиилэрин-көрүүлэрин, үлэ харыстабылыгар уонна бырамыысыланнас өттүнэн куттала суох буолууга билиилэрин көрдөрөр тургутугу толороллор. Иккис чааһыгар күн аайы оҥорор үлэлэригэр үөрүйэҕи, сатабылы хайдах туһаналларын сиһилии көрдөрдүлэр. Бу түһүмэх быраактыка хабааннаах буолар. Сөпкө эппиэттээтэхтэринэ, быраактыка сорудаҕын сөпкө толордохторуна, баал эбиллэр. Манна түргэн тэтим эмиэ учуоттанар.
“Идэтигэр бастыҥ” күрэх “Таас Үрэх Нефтегазодобыча” үлэһиттэрэ идэлэригэр маастарыстыбаларын үрдэтэллэригэр кыаҕы биэрэр. Корпоративнай үөрэх, үүнэргэ-сайдарга көҕүлээһин – тэрилтэ ыытар үлэтин биир солбуллубат чааһа. Маны таһынан уопуту тарҕатарга-атастаһарга, саҥа технологиялары киллэрэргэ, идэни уонна үлэ култууратын өрө тутарга көмөлөһөр.
Көрүү-күрэх олохтоох түһүмэҕин кыайыылаахтара бастыҥ үлэһит аатын “Роснефть” таһымыгар көмүскүөхтэрэ.
Бэй.кэр.
Хаартыска: “Таас Үрэх Нефтегазодобыча”
