Көмүс оҥоһук тапталга билинэргэ, махталы, үтүө сыһыаны биллэрэргэ үйэлээх бэлэх. Көмүс – мааны киэргэл эрэ буолбакка, хамсаабат баай-дуол, кини үйэттэн үйэҕэ бэриллэр. Ол да иһин, «Сбераналитика» чинчийиитинэн, 2024 сыл бастакы кыбаарталыгар көмүс оҥоһугу атыылаһыы ааспыт сыллааҕар 10% үрдээбит.
Дьэ, оттон Саха сирин олохтоохторо көмүһү төһө сэҥээрэллэрин, тугу сөбүлээн атыылаһалларын, УРУУ ювелирнай хампаанньа көрдөрүүтүттэн көрүөҕүҥ:
- Быйыл Саха сирин олохтоохторо кыһыл көмүһү ордук элбэхтэ атыыласпыттар. Хампаанньа кыһыл көмүһү атыылаан киллэрбит суумата ааспыт сыллааҕар 40% үрдээбит.
- Ыал буолуу биһилэҕин атыыта урукку таһымҥа турар. Дьон 3-5 мм кэтиттээх ыал буолуу биһилэҕин ордук сөбүлээн ылаллар эбит. Сыл саҕаланыаҕыттан маннык биһилэх 800-тэн тахса устуука атыыламмыт. Ортотунан биир паарата 27 тыһыынча солкуобай.
- Ыал буолуу биһилэҕин аахпакка эрэ, кыһыл көмүс атыыта 60% үрдээбит. Сүрүннээн биһилэх уонна ытарҕа ылбыттар.
- Бриллианнаах кыһыл көмүс оҥоһуктары дьон туохтааҕар да ордук сэҥээрэр эбит. Хампаанньа киллэрбит уопсай сууматыттан 70%-на бриллианнаах кыһыл көмүс оҥоһук атыытыттан киирбит.
- Кыһыл көмүс симэх атыыта төһө даҕаны үрдээтэр, үрүҥ көмүс киэргэли сахалар син биир өрө туталлар. Атыы 50%-нын улахан ыйааһыннаах сахалыы симэх киллэрэр эбит. Сыл саҕаланыаҕыттан 400 киилэттэн тахса илин-кэлин кэбиһэр, бастыҥа уонна сахалыы ытарҕа атыыламмыт.
- Оттон үрүҥ көмүс ытарҕа атыыта 96% улааппыт. Быйыл хампаанньа 13 тыһыынчаттан тахса үрүҥ көмүс ытарҕаны атыылаабыт. Онон үрүҥ көмүс атыыта былырыыҥҥытааҕар икки төгүл үрдээбит.
- Быйыл УРУУ хампаанньалар бөлөхтөрө 500 мөлүйүөн солкуобайы киллэрэр былааннаах.
Онон, Саха сирин олохтоохторо кыһыл көмүһү сөбүлээн атыылаһаллар, сахалыы симэх хамаҕатык барар буолбут, оттон бриллианнаах оҥоһук сол даҕаны саамай баҕалаах киэргэл эбит.
Туйаара Корякина
