Аммаҕа өр күүтүүлээх муоста икки сыл устата тутуллан үөрүүлээх аһыллыыта буолла. Түөрт нэһилиэк дьоно-сэргэтэ аны саас хаайтарбакка харгыһа суох айанныыр кыахтанна.
Амма улууһугар бииртэн биир үөрүүлээх сонуннар буола тураллар. Балаҕан ыйын 17 күнүгэр 1965 сыллаахха тутуллан сулууспалыы турбут муоста эргэрэн, хаарбах туруктанан, хас саас аайы Кириэстээх үрэҕэ тоҕо көтөн ааһара. Ол кэмҥэ бу хайысхаҕа олорор түөрт нэһилиэк дьоно-сэргэтэ киин сиртэн быстан хаалаллара. Дьэ ол билигин туоратыллан, сабыс-саҥа улахан, 80 туонна уйуктаах муоста үлэҕэ киирдэ.
“Аны дьэ абыранабыт. Урукку өртүгэр олус эрэйдэннибит. Хастыы эмэ нэдиэлэнэн суолбут быстан хаалара. Араас ыарахан балаһыанньалар үөскүүллэр этэ. Онон маннык муостаны тутан үлэҕэ киллэрбит улууспут салалтатыгар, дьокутааппытыгар Руслан Еремеевич Федотовка, тутааччыларга махталбыт улахан”, – дэһэллэр ол эҥэр нэһилиэк баһылыктара.
Муостаны Прокопий Николаев салайааччылаах КСК ХЭТ “Мосты севера” тутан үлэҕэ киллэрдэ. “Бастаан муостаны Руслан Еремеевич Федотов, улуус салалтата уонна бэйэбит тэрилтэбит тутан саҕалаабыппыт. Биһиги бу быһаарыныыны баар кыһалҕаны өйдөөн туран ылыммыппыт. Онтон салгыы өрөспүүбүлүкэ суол хаһаайыстыбатыгар уонна тырааныспарга министиэристибэтинэн үбүлэнэн икки сыл устатыгар тутуллан бүттэ. Тэрилтэбит аатыттан дьон ааһан иһэн сынньанар бэсиэдкэтин бэлэх быһыытынан оҥорон биэрдибит”, – диэн кэпсиир генеральнай бэдэрээтчит Прокопий Николаев.
“Муоста тутуута стратегическай суолталаах. Билигин манан хайа баҕарар ыарахан уйуктаах массыыналар, комбайннар ааһыахтарын сөп. Тоҕо диэтэр инникитин өрөспүүбүлүкэни бурдугунан хааччыйар кыахтаах “Амма” ААУо бу хайысхаҕа баар. Өссө да былааҥҥа улуус салалтатын кытта бииргэ үлэлэһэн Амма Наахараҕа диэри түөрт муоста тутуллуохтаах”, – диэн этэр Ил Түмэн дьокутаата Руслан Федотов. Муоста үөрүүлээх аһыллыытын туһунан сиһилии “Амма олоҕор” ааҕан билсээриҥ.
Наталья Бубякина, ulus.media
