Биир ый анараата биллэр урбаанньыт, уопсастыбанньык, “Добровольческай штаб” салайааччыта Афанасий АЛЕКСЕЕВ Алдан оройуонугар ойуур маһын соҕотуопкалыы кэлбит үлэһиттэри кытта кэпсэппит видеота социальнай ситимнэринэн киэҥник тарҕаммыта.
Кини көстөн турар кэпсээниттэн Саха сирин олохтоохторо маһы соҕотуопкалыыр «Ангара» ООО уонна «Вудленд24» ООО диэн улахан хампаанньалар Алдан оройуонугар 54 538 уонна 177 405 тыһ. га иэннээх сиргэ сылга 107 062,2 уонна 243 110,9 тыһ. куб. м. маһы соҕотуопкалыыр соруктаах, буолаары буолан 46 cылга, үлэлээри бэлэмнэнэ сылдьалларын билбиттэрэ.
Дьон истибиттэрин, көрбүттэрин тута кыайан итэҕэйбэтэхтэрэ, тоҕо диэтэххэ, икки сыллааҕыта Ил Дархан Айсен Николаев бу кэрдиини тохтоппута эбээт. Кини оччолорго: «Ыытыллыбыт аукцион, биллэн турар, үгүс боппуруоһу көтөҕөр. Итиннэ барыта эриэ-дэхси буолбатах. Бырайыак эмиэ үгүс боппуруоһу үөскэтэр, үгүс бастара (разделлара) суохтар, докумуоннара кырааматынайа суохтук оҥоһуллубуттар, булгуччу ыытыллыахтаах эспэртиисэ саҥа буолла. Маныаха исписэлиистэр “отрицательнай” түмүгү биэрдилэр”, — диэн иһитиннэрбитэ. Ону баара, икки сыллаах хааччах кэмигэр, дьон ити айдааны умна быһыытыйбытын кэннэ, ханнык да сокуону кэспэтэх аатырбыт аукцион кыайыылаахтара бырайыактарын олоххо киллэрэн эрэллэр.
Алексеев видеотын кэннэ улахан аймалҕан тахсан, муус устар 12 күнүгэр Амма дьаһалтатын дьиэтигэр «соһуччу» саҕаламмыт ойуур соҕотуопкатын тула салалта уонна уопсастыбаннас кыттыылаах улахан кэпсэтии тэриллибитэ. Кэпсэтиини Амма улууһун баһылыга Николай АРХИПОВ салайан ыыппыта. Уопсастыбанньыктар ыйытыыларыгар хоруйдаары СӨ Экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Евгений ПЕРФИЛЬЕВ, «Ангара» ООО уонна «Вудленд24» хампаанньалар дириэктэрдэрэ Максим БЕЛОБОРОДОВ кыттыбыттара.
Биһиги бу мунньахха Дьокуускай куораттан тиийэн кыттыбыт суруналыыс, уопсастыбанньык Владислав КОРОТОВТАН кэпсэтии тугунан түмүктэммитин кэпсииригэр көрдөстүбүт:
- Аммаҕа мунньах буоларын истэммит, Дьокуускайтан уопсастыбанньыктар тиийэн кытынныбыт: миигин кытта Дмитриева Валентина Иннокентьевна, экологияҕа биллэр эспиэр, «Эйгэ» уопсастыбаннай тэрилтэ салайааччыта, саха бастакы экологтарыттан биирдэстэрэ уонна Амматтан төрүттээх көхтөөх уопсастыбанньык Айыл Дьулурҕа.
Билигин Амма үрдүгэр Алдан улууһугар (сорох дьон Амма улууһугар буола турар диэн өйдөөбүт) икки тэрилтэ ойуур маһын кэрдээри бэлэмнэнэ сылдьаллар. Ону истэн, бар дьон олус айманна. Биллэн турар, айманарга олус улахан төрүөт баар.
2020 c. итиннэ аукцион биллэрбиттэригэр биһиги, уопсастыбанньыктар, дойду бэрэсидьиэнигэр В.В. Путиҥҥа 16 тыһ. киһи илии баттааһыннаах көрдөһүү суруйан ыыппыппыт – Амма ойуурун кэрдимэҥ, Амма экологиятын алдьатымаҥ диэн. Онуоха Ил Дархан Айсен Николаев даҕаны, СӨ Экологияҕа министиэристибэтэ даҕаны Амма өрүс сүнньүгэр ойууру кэрдии тахсыа суоҕа диэн уоскутан кэбиспиттэрэ.Дьиҥэр, онно арыый атыннык хамсаныахтаах эбиппит.
Оччолорго аукцион кыттыылааҕа Маслобойников дьон наһаа утарыласта, онон ойууру кэрдэртэн аккаастанабын, дуогабарбын көтүрэбин, кэрдиллэр сир куортамыгар төлөөбүт 8 мөл. харчыбын төнүннэрэбин диэн быһаарыммыта. Онтон ол киһини, дуогабаргын кэстиҥ, ылсыбыт үлэҕин тиһэҕэр тиэрдиэхтээххин диэннэр, суукка тардыбыттара. Онуоха кини ити тэрилтэлэрин Белобородов Максим диэн киһиэхэ атыылаабыта. Эспэртиисэ түмүгүнэн, кинилэр хамсаныылара барыта докумуонунан сөп курдук.
Хомойуох иһин, өрөспүүбүлүкэ сокуонугар ирбэт тоҥҥо маһы кэрдии регламена суох. Өссө икки сыллааҕыта РФ Госдууматын Экологияҕа кэмитиэтин салайааччыта биһиги министиэристибэбитигэр уонна Ил Түмэн Айылҕа харыстабылын кэмитиэтигэр өрөспүүбүлүкэ маһы кэрдии регламеныгар бэйэтин эбиилэрин, көннөрүүлэрин, ирбэт тоҥҥо маһы кэрдиигэ хааччахтары киллэриэн сөп диэн эппитин үрдүнэн, икки сылы быһа туох да хамсааһын барбата. Сокуоммут ситэтэ суох буолан, икки сыллааҕыта былааннаммыт үлэлэр ыытыллар буоллулар. Норуот утарбытын, наука үлэһиттэрэ ирбэт тоҥҥо маһы кэрдии туох содуллааҕын элбэхтик эппиттэрин, суруйбуттарын үрдүнэн.
Итиччэ улахан иэннээх кэрдиллиэхтээх сиргэ Кыһыл кинигэҕэ киирбит 20-тэн тахса үүнээйи үүнэр диэн эттилэр. Онуоха соҕотуопкаһыт Экология министиэристибэтин ирдэбилин барытын тутуһуохпут, үчүгэйдик үлэлиэхпит диэн эрэннэрэр. Ол эрээри ону хонтуруоллуур уустук буолуо. Онон билигин биһиги маһы кэрдии барар сиригэр уопсастыбаннай хонтуруолу күүскэ ыытыахтаахпыт уонна ирбэт тоҥҥо, чуолаан өрүстэр сүнньүлэригэр, мас кэрдиитин бобор сокуон тахсарыгар үлэлиэхтээхпит. Биһиэхэ «Ирбэт тоҥ туһунан» сокуон баар эрээри, ситэтэ суох, - диэн уопсастыбанньык Амма сүнньүгэр маһы кэрдии сүрүн төрүөтүн ыйда.
БАР ДЬОН УОСКУЙАР САНААТА СУОХ
Мантан сиэттэрэн, Дьокуускайга муус устар 14 күнүгэр уопсастыбанньыктар төгүрүк остуол тэрийэн ыыттылар. Уопсастыбаннай палаата саалатыгар толору дьон муһунна. Күүрээннээх, элбэх мөккүөрдээх, сытыы тыл этиилээх тэрээһин буолбутун социальнай ситимнэр бэлиэтээтилэр. Дьон өрөспүүбүлүкэ айылҕаҕа харыстабылын урукку миниистирэ Сахамин Афанасьев, билиҥҥи миниистир солбуйааччыта Евгений Перфильев этиилэрин сөбүлэспэттэрин биллэрдилэр. Ирбэт тоҥу үөрэтэр учуонай А.Н. Федоров ирбэт тоҥҥо итинник улахан иэннээх мас кэрдиитэ туох иэдээҥҥэ тиэрдэрин туһунан кэпсээнэ кэлбит дьону улаханнык харааһыннарда.
Тэрээһин кэнниттэн уопсастыбанньык Афанасий Алексеев бэйэтин телеграм-ханаалыгар Амма сүнньүгэр саҕаланаары турар мас соҕотуопкатын хайдах тохтотор туһунан этиилэргитин Этот адрес электронной почты защищён от спам-ботов. У вас должен быть включен JavaScript для просмотра.. электроннай аадырыска күүтэрин суруйда. Кини этэринэн, төгүрүк остуол түмүк докумуона өрөспүүбүлүкэ салалтатыгар уонна федеральнай былаас уорганнарыгар бараары бэлэмнэнэр. Уопсастыбанньык Саха сирин олохтоохторо Амма сүнньүгэр мас соҕотуопкатын тохтотор биир сомоҕо санаалаахтар диэн бигэтик этэр. Оттон эһиги туох санаалааххыт?
Сонуну бэлэмнээтэ Күндэли
Хаартыска: Владислав Коротов телеграм-ханаалыттан
Сэҥээриилэр