Мииринэй улууһун кырыы нэһилиэгэр — Сүлдьүкээргэ дьэ күүтүүлээх ВОЛС лииньийэтэ тардыллан, түргэн тэтимнээх интэриниэт холбонно. Бу туһунан, мин, Садын национальнай эбэҥки нэһилиэгин баһылыгын солбуйааччыта Луиза Андрееваҕа чыпчылҕан ыйытык биэрдим.
--Луиза Семеновна, Сүлдьүкээргэ, кэмниэ-кэнэҕэс, түргэн күүрүүлээх интэриниэт кэлбитинэн эҕэрдэлиибин уонна үөрүүгүтүн тэҥҥэ үллэстэбин.
-- Махтал. Оптоволокно хаабылын “Светлэй-Сүлдьүкээр” уот лиинньийэтинэн силбэһиннэрэн тартылар. Интэриниэккэ холбооһун үлэлэрин «Ростелеком» Мииринэйдээҕи салаата сүрүннүүр.
-- Луиза Семеновна, Сүлдьүкээр аттынааҕы уот баҕаналара, урут, улахан тыалларга суулуталыы тураллар этэ. Билигин отут биэрэстэ усталаах уот лиинньийэтин туруга хайдаҕый?
--Манна хапытаалынай өрөмүөн ыытыллан турар. Сууллаары турар уот баҕаналарын уларыталаабыттара. Онон оптоволокно хаабыла бу баҕаналарынан барар буолан эрэбиллээх.
-- Түргэн тэтимнээх интэриниэт биир бастакынан ханна киирдэ?
-- Маҥнай нэһилиэк дьаһалтатыгар холбоотулар. Онтон, Сүлдьүкээр оскуолатыгар холбуохтаахтар, ол эрээри билиҥҥитэ тэхиниичэскэй мэһэй үөскээн үлэ тардылынна. Ону сотору туоратыахтара.
-- Сүлдьүкээргэ билигин төһө киһи олороруй? Тэтимнээх интэриниэт кэлиитэ олохтоохторго улахан сэргэхсийиини аҕалбыт буолуохтаах...
-- Биллэн турар. Бу – инники сайдыыбытыгар дьоһуннаах дьаһал. Нэһилиэкпитигэр 330 киһи олорор. Оптоволокно хаабылыгар холбонооччулар испииһэктэрэ баар. Сыр-мыр сүлдьүкээрдэр дьиэлэригэр киирэн иһиэҕэ.
--Дьэ, интэриниэт кэлиитэ, кырыыба сытар эбэҥки нэһилиэгэр сайдыыны, саҥа саҕахтары үөскэтиэ диэн эрэнэбин.
--Махтал.
Станислав Алексеев, Мииринэй куората.
