Куорат аҕа баһылыга Евгений Григорьев, көрүүтэ-харайыыта суох кыыл барбыт сылгыны-сүөһүнү тутар-харайар анал ыстараап-былассаакка туталларыгар соруйда.
Ол туһунан кини бэйэтин инстаграмм сирэйигэр биллэрдэ. Григорьев, олоххо хайыы үйэ бигэтик киирбит атын куораттар быраакыткаларын болҕомтоҕо ылан, Дьокуускайга киллэрэргэ сананна.
«Атын куораттарга, туох да көрүүтэ-харайыыта суох кыыл барбыт сылгыны-сүөһүнү тутан ылан, анал былаһааккаларга илдьэллэр. Ол былаһааккалартан, иччилэрэ кэлэн, кыылы тиэйэргэ бараммыт бөдөҥ суумманы төлөөн туран, төттөрү бэйэлэригэр ылыахтарын сөп».
Туймаада хочотун аҕа баһылыга бэлиэтииринэн, маннык миэрэни туһаныы, дьалаҕай хаһаайыттар бэйэ бодолорун тардыналларыгар ыҥырыаҕа.
«Аҕыйахта харчынан накаастаннахтарына, кинилэр түргэнник өйдөнүөхтэрэ. Ол кэннэ, сылгы-ынах хайдах буолуохтааҕын курдук, бэйэтин мэччирэҥиттэн аны тахсыа суоҕа. Бу дьаһалы суһаллык олоххо киллэрэллэригэр тустаах үлэһиттэрбэр номнуо сорук туруордум».
Санатар эбит буоллахха, уокуруктааҕы дьаһалтаҕа, көрүүтэ-харайыыта суох сылдьар сылгы-сүөһү иччилэрин эппиэтинэскэ тардыылара, бу бастакы сырыы буолбатах. Бэйэтин кэмигэр маннык бачыымы урукку баһылык Сардаана Авскентьева көтөҕө сатаабыта. Ыстараапытыыр былаһаакканы, тыа хаһаайыстыбатын академиятын уораҕайыгар олохтуохтарын баҕарбыттара. Ол эрэн, сылгыһыттар иһинээҕи атааннаһыыларыттан, бырайыак ситэ олоххо киирбэтэҕэ. 2020 сыллаахха, саньытаарынай усулуобуйа сөп түбэспэтинэн, аккаас кэллэ диэн, оччотооҕу мэр Сардаана Авскентьева иһитиннэрбитэ.
Бырайыак быһыытынан, биир сылгыга – үс тыһыынча солкуобай ыстараап төлөнүөхтээҕэ. Бүгүҥҥү күн туругунан үс тыһыынча солкуобай ыстараап – биир эрэ үөр сылгыга. Ити кыра. Түмүк биэрбэт.
Былырыыҥҥы сыл көрдөрүүлэринэн, Дьокуускай куорат муниципальнай тэриллии уонна таһынааҕы бөһүөлэктэргэ 3169 сылгы иитиллэн турар.
