Киир

Киир

Саха сирин ааттаах-суоллаах спортсменнара Айаал Лазарев, Анастасия Диодорова, Степанида Артахинова, Алена Дмитриева кыттыбыт XXXII Олимпийскай уонна Токиоҕа буолбут XVI Паралимпийскай оонньуулара соторутааҕыта эрэ буолан ааспыт курдуктара. Оттон Степанида Артахинова оҕунан ытыыга ситиһиилээхтик кыттан, Сахатын сиригэр боруонса мэтээли илдьэ кэлбитэ. Олимпиадаҕа уонна Паралимпиадаҕа кыттыы уонна кыайыы кынаттаныы хаһан баҕарар ыччат дьоҥҥо уонна үүнэр көлүөнэҕэ күүстээх санаа, кыайыыга дьулуур, тулуур бастыҥ холобура буолар. Биһиги өрөспүүбүлүкэҕэ успуорду сайыннарыыга ураты болҕомто ууруллар. Онуоха АЛРОСА хампаанньа өрөспүүбүлүкэ социальнай-экэнэмиичэскэй олоҕор көхтөөхтүк кыттара уонна өрүү да көмөлөһөрө төһүү күүс буолар.

9f6fcb989ee69cbd80e514308d86cde26d76d9a4

Алмаас хампаанньата Саха сиригэр успуорду сайыннарыыга уонна успуордунан ким баҕалаах барыта дьарыктанар кыахтанарын туһугар киэҥ хабааннаах бырагырааманы олоххо киллэрэр. Араас таһымнаах успуорт тэрээһиннэрин успуонсардыыртан саҕалаан оҕолор спортивнай сиэксийэлэрин үлэлэтэр, успуорт бөдөҥ эбийиэктэрин үбүлээн туттарар.

АЛРОСА үбүнэн көмөлөһөр буолан, социальнай эбийиэктэри тутуу бырайыактара дьиҥ олоххо киирэллэр. Холобур, быйыл үлэҕэ киириэхтээх оннук тутуулартан биирдэстэрэ – Үөһээ Халыма улууһун Зырянкатыгар тутулла турар Култуура-успуорт комплекса.

4a9973720d2b5d1f6f0b9c0c8a7d7871fd39cac8

«Бу тутуу эмиэ да култуура, эмиэ да успуорт аныгылыы эбийиэгэ буолар. Зырянка үрдүнэн аныгы ирдэбилгэ эппиэттиир суос-соҕотох тутуу бүтүн оройуон үрдүнэн суолтата улахан. Бу сонун тутуу биһиги улууска успуорт уонна култуура сайдыытыгар тирэнэр тирэх, чиҥ үктэл буолуоҕа. Оттон уонна, саамай сүрүнэ, бөһүөлэк олохтоохторо атын сиргэ эрэ баран күрэхтэһэр эбит буоллахтарына, билигин бэйэлэрэ эмиэ миэстэтигэр араас күрэстэри, күрэхтэһиилэри тэрийэн, ыалдьыттары көрсөр кыахтаналлар. Айымньылаах тэрээһиннэри уонна спартакиадалары ыытарга анаммыт былаһаакка баар буолуоҕа», – АЛРОСА генеральнай дириэктэрин солбуйааччы Алексей Дьячковскай бэлиэтээн эттэ.

Зырянка бөһүөлэгэр дьэндэйэр Култуура-успуорт комплекса үс булуоктан турар буолар. Ол эбэтэр, успуорт булуогар түрүбүүнэлээх, 214 олбохтоох саала, таҥас устар-кэтэр хос, тренажердарга эрчиллэр хос былааннаммыта. Кулууп булуогар 212 көрөөччү олорор олбохтордоох саала, хореография саалата, киинэ көрдөрөр сир (киносветопроекционная), ону таһынан кинигэ харайар анал хостоох бибилэтиэкэ түстэнэр. Оттон балар ыккардыларыгар баар, холботолуур булуокка – административнай тутуулар түстэниэхтэрэ. Күүтүүлээх тутуу уопсайа холбоон, 2 тыһ. кв м иэннээх.

Бу курдук, АЛРОСА үбүлээһинин суотугар тутуллубут, тутулла турар успуорт эбийиэктэрэ Саха сирин араас муннугар дьэндэһэн, олохтоохтор эт-хаан өттүнэн сайдалларыгар, чөл туруктаналларыгар бигэ тирэх буолаллар. Туох да омуна суох хампаанньа успуорт тутууларын үбүлүүрэ үтүө үгэскэ кубулуйда. Холобур, кэнники кэмҥэ үлэҕэ киирбит успуорт тутууларын ортотугар Амма улууһун Бөтүҥүгэр тутуллубут успуорт адаптивнай көрүҥнэринэн дьарыктанарга анаммыт элбэх хайысхалаах (многофункциональнай) успуорт саалата уонна Чурапчыга РСФСР, ССРС, САССР, үтүөлээх тириэньэрэ, өрөспүүбүлүкэ үтүөлээх учуутала Дмитрий Петрович Коркин аатынан өрөспүүбүлүкэтээҕи успуорт, олимпийскай эрэсиэрбэ интэринээт-оскуолатын тутуута бааллар.

Успуорду кэлимник, көхтөөхтүк өйүүр

АЛРОСА хампаанньа успуорду өйүүр үтүө үгэһин бэлиэтииргэ өрөспүүбүлүкэ биир улахан, ааһа баран, бүтүн норуоттар икки ардыларынааҕы таһымнаах бырайыагын – “Азия оҕолоро” норуоттар икки ардыларынааҕы успуорт оонньууларын – таарыйбакка ааһарбыт толорута суох буолуоҕа. Ол курдук, АЛРОСА хампаанньа – “Азия оҕолоро” оонньуу хара олохтонуоҕуттан уһун сыллар тухары генеральнай успуонсар. Итини таһынан хампаанньа Дмитрий Коркин сырдык аатын үйэтитэр Норуоттар икки ардыларынааҕы тустуу турнирын, Роман Дмитриев сырдык аатыгар 1986-1998 сыллааҕы төрүөх уолаттар ортолоругар тэриллэр эмиэ Норуоттар икки ардыларынааҕы көҥүл тустуу турнирын, “Манчаары оонньуулара” успуорт национальнай көрүҥнэригэр, Саха сирин норуоттарын спортивнай оонньууларын, ону тэҥэ Мииринэй куоракка 2020 сылга буолбут хапсаҕайга өрөспүүбүлүкэ­тээҕи турнирдарын курдук үлахан күрэхтэргэ хайаан да тутаах успуонсар буоларыгар үөрэнэн да бардыбыт.

Ити ааттаммыт улахан күрэхтэри таһынан кыра, орто таһымнаах төһөлөөх күрэххэ, спортсменнарга АЛРОСА көмө, өйөбүл буолбутун ааҕан сиппэккин. Саха сирин успуордун миниистирэ Иннокентий Григорьев этэринэн, хампаанньа сүҥкэн улахан бырайыагы олоххо киллэрэр: успуорт федерациятан араас көрүҥнэрин көхтөөхтүк өйүүр, мас-рестлини норуоттар икки ардыларынааҕы таһымҥа таһаарыыга кыттар, оҕо успуордугар, үрдүк ситиһии успуордугар эмиэ ураты болҕомтону уурар.

Өрөспүүбүлүкэ күрэхтэһиилэрин уонна успуорт федерациятын үбүлээһин – АЛРОСА хампаанньа успуорду өйүүр сүҥкэннээх үлэтин баара эрэ кыра чааһа, өлүүскэтэ диир оруннаах. Ол курдук, АЛРОСА аҥаардас Култуура-успуорт комплексын иһигэр 50-ча араас сиэксийэ үлэлиир. Ол иһигэр успуорт национальнай каөрүҥнэригэр – хапсаҕайга уонна мас-рестлиҥҥэ – утумнаахтык ылсан дьарыктыыллар.

Итини таһынан хампаанньа бэйэтэ көҕүлээн, тэрийэн-бэрийэн, үбүлээн ыытар туһунан тэрээһиннэрдээх. Холобур, «Настроение АЛРОСА» диэн бэртээхэй бэстибээл дьон бэлиэ болҕомтотун ылар. Бу бэстибээлгэ оҕолор сыччах күрэхтэһэринэн эрэ муҥурдамматтар. Араас көрдөрөр-билиһиннэрэр үлэ барар (показательные выступления), Арассыыйа аатырбыт, биллэр-көстөр спортсменнарын, аан дойду чөмпүйэнээттэрин уонна олимпиада чөмпүйүөннэрин аҕалан маастар-кылаастары тэрийтэрэр. Оҕолор ыйар сулус оҥостор дьоруойдарын илэ көрөн, атах тэпсэн олорон сэлэһэн, кинилэр курдук кыайыыга-хотууга дьулуурдаах, эт-хаан өттүнэн сайдыылаах буоларга дьулуһалларыгар көмөлөһөр.

Ону таһынан хампаанньа баҕалаах киһи барыта кыттар кыахтаах “Алмаастаах сүүрүү” диэн бырайыагын Мииринэйгэ уонна Дьокуускайга тэрийэн ыыппытын сырдатан турабыт. Ону таһынан, АЛРОСА оҕо талаанын эрдэттэн арыйар, ону өйүүр туһугар “Чөмпүйүөн буол!” диэн оҕолорго анаммыт бырайыак көхтөөх кыттааччыта, тэрийээччитэ буолар.

«Азия оҕолорун» нэһилиэстибэтэ

“Азия оҕолоро” норуоттар икки ардыларынааҕы успуорт оонньуутун тэрийии Саха сиригэр бүттүүн успуорт эйгэтэ сайдарыгар – успуорт көрүҥнэриттэн саҕалаан успуорт бөдөҥ эбийиэктэрин тутууга тиийэ – төһүү буолбута. Өрөспүүбүлүкэ киин куората Дьокуускай эмиэ үтүө өттүгэр уларыйбыта. Баарынан эттэххэ, Дьокуускайга дьэндэспит успуорт бөдөҥ эбийиэктэрин сүрүн өттө чопчу ити оонньууларга сыһыаран тутуллубуттара. Ол курдук, холобур, «Эллэй Боотур» дыбарыас, “Долгун” успуорт-чэбдигирдэр комплекс, “Кыайыы 50 сылын” комплекс курдук баараҕай тутуулар алмаас хостооһунуттан уонна атыытыттан киирэр үпкэ тутуллубуттара.

Андрей ШИЛОВ суруйуута.

Тарҕат:

Санааҕын суруй