Бу күннэргэ бассаапка Чурапчы улууһун олохтооҕо Амыртан кэлбит от хаачыстыбата куһаҕанын, талах бөҕө холбуу охсуллубут буолан, киһи атырдьаҕынан да сатаан ороон-хостоон ылбатын туһунан кэпсээбитэ. Ол видео өрөспүүбүлүкэбит былаһын устун тарҕанан, элбэх киһи көрдөҕө буолуо.
Биллэрин курдук, быйыл от үүммэтэҕин, кураанын таһынан олус элбэх баһаардаах дьыл туран, өрөспүүбүлүкэбит окко былаана кыайан туолбатаҕа. Ол курдук, барыта 457 553 туонна от бэлэмнэниэхтээх этэ да, былаан 86 % эрэ туолбута. Түмүгэр, Сахабыт сирин 8 улууһугар отторо тиийбэтин туһунан биллэрбиттэрэ. Тиийбэт оту Амыр уонна Магадаан уобаластарыттан аҕаларга кэпсэтии барбыта.
Чурапчы улууһун т/х-тын управлениетыгар эппиттэринэн, бу Амыр отун 1 туоннатын 5 тыһ. солк. атыылаһыллыбыт. Бу кэлбит партия оту бэрэбиэркэлээн көрөн баран, улуустааҕы ТХУ “хаачыстыбатынан дуогабарга кэпсэтиллибиккэ ханан да эппиэттэспэт” диэн быһаарыы ылыммыт. Онон оту аҕалан атыылаабыт поставщик бу отун уларытарыгар дьаһал бэриллибит. Биллэрин курдук, билигин т/х-тынан дьарыктанар улуустарга барыларыгар сүөһү уонна сылгы кыстыгын туругун хонтуруоллуур оперативнай штабтар тэриллэн үлэлииллэр. От хаачыстыбатын хонтуруоллуур эбээһинэс эмиэ бу штабтарга сүктэриллэн сылдьар.
Маны Ил Түмэн Тыа сиригэр уонна аграрнай бэлиитикэҕэ кэмитиэтин бэрэссэдээтэлэ Андрей Находкин кэмэнтээрийдиир:
– Улуустар хаһаайыстыбалара, Т/х-тын министиэристибэтин кытта уопсай сөбүлэҥинэн, Амыр, Магадаан уобаластарыгар, Забайкалье кыраайыгар, ону тэҥэ Сахабыт сирин сорох улуустарыгар ол тиийбэт оту толорууга үлэлэспиттэрэ. Бу үлэ чэрчитинэн, улуустар тэрийбит мобильнай биригээдэлэрэ өрөспүүбүлүкэ тас өттүгэр оту бэлэмнээбиттэрэ уонна атын эрэгийиэннэргэ олохтоох хаһаайыстыбалартан бэлэм оттоммут оту атыылаһарга дуогабардаспыттара. Бу икки барыйаантан бастакы түгэнигэр, ол эбэтэр атын эрэгийиэҥҥэ бэйэбит дьоммут тиийэн бэлэмнээбит отторун хаачыстыбатыгар, киһи соччо долгуйуо суоҕун сөп этэ. Оттон атын эрэгийиэн олохтоохторо бэйэлэрэ бэлэмнээбит отторун атыылаһыыга, биллэн турар, кыра дьиксинии син биир баара. Биллэрин курдук, оту тиэйии боппуруоһунан СӨ ТХМ-а бэйэтэ дьарыктанар. Санаттахха, ол тиэллэн кэлэр от хаачыстыбатыгар эппиэтинэһи эмиэ кини сүгэр. Ону, ТХМы сэргэ, улуустар бэйэлэрэ эмиэ кэтээн көрөллөр.
Бу үөскээбит балаһыанньаны Сахапарламент.ру. саайт кэрэспэдьиэнэ ТХ миниистирэ Александр Атласовтан эмиэ чуолкайдаста. Миниистир маннык диир:
– Хомойуох иһин, ити Чурапчыттан тэриллэн барбыт мобильнай биригээдэ оттообут ото.
Быйыл, уопсайынан, өрөспүүбүлүкэбитигэр тиийбэт оту толуйаары тэрилибит мобильнай биригээдэлэр барыта 30 тыһ. тахса туонна оту оттоотулар. Ол иһигэр, Чурапчыттан тэриллибит 2 мобильнай биригээдэ Амыр уобалаһыгар 1000 туонна оту бэлэмнээбитэ. Соторутааҕыта О. диэн чааһынай урбаанньыт Чурапчы улууһугар ол бэлэмнэммит оту тиэйэн аҕалан атыылаабыта. Ол эрээри, бу кэлбит партия оту улуустааҕы т/х-тын управлениета “от – дуогабарга эппиэттэспэт хаачыстыбалаах, онон маны аҕалан батарбыт киһи бу отун атынынан солбуйан биэрдин” диэн дьаһал ылылынна.
Владимир Степанов.
