Оҕо Айымньытын Киинэ(ЦДОД), бу хаартыскаҕа көстөр дьиэ тутуллан бүттэҕинэ, киэҥ-куоҥ, тупсаҕай быһыылаах-нөрүөннээх уораҕайга киириэхтээх.
Манна баар буолуохтаахтар үчүгэй акустикалаах кэнсиэртиир саала. Успуордунан дьарыктанарга аналлаах хостор.
Араас куруһуоктар. Холобур – «Моделирование уонна архитектура оҥоһуктара”, “Национальнай киэргэллэр уонна урамньы”, “Наука уонна тиэхиникэ саҥа олуктара», уо.д.а интэриэһинэй дьарыктарга уһуйар кэбиниэттэр.
Холлара кэҥэс, тупсаҕай буолуохтара.
Дьиэ сүрүн өттө ураннаан, киэргэтиллэн оҥоһуллуоҕа.
Бу – Мииринэй куорат киинин биир бөдөҥ, кэскиллээх тутуута. Кинини алмаастаах хампаанньа үбүлүүр.
Ол да иһин тутааччылар кыладыйаллара харахха быраҕыллар.
Тымныы да күннэр бүрүүккээтэллэр тутуу салҕанан барар.
Тутуу ис барааныгар, эркинигэр үлэлэр ыытыллаллар.
Бэдэрээччит, эбийиэги куһаҕана суох тэтимнээхтик дьэндэтэн истэҕинэ кыһын эмискэччи кэлэн хаалла.
Оҕо Айымньытын Дьиэтин 2022 сылга үлэҕэ киллэрэргэ бэлэмнэнэллэр. Тустаах кэмигэр киириэ дуо бу сүҥкэн эбийиэк?
Станислав Алексеев. Мииринэй куората. Ааптар хаартыскалара.
