Соторутааҥҥа диэри Сунтаары кытары айан суола суох буолан, Татыйыына маҕаһыын сибиэһэй бородууксуйаны аҕалбат буола сылдьыбыта.
Билигин, «Татыйыынаҕа» дьиэ бэлимиэнэ, ынах этин уонна куурусса фарштара, тефтель, фрикадельки, кэтилиэт, гуляш (ынах этэ), сахалыы лэппиэскэ , “песочница”- бирээнньиктэр, туортар, бэрэскилэр, атын бурдук аһылыктар баар буоллулар.
Ардыгар үүт оҥоһуктар – суорат, үүт кэлэллэр. Кэмпэндээйи аһылыкка туттуллар тууһа биэстии киилэлээх мөһөөччүктэринэн кыстана сытар.
Мииринэй олохтоохторо, бородуукта Сунтаартан бэрт кыра баартыйаларынан уонна кэмчитик кэлэр диэн мунаараллар. Манна эппиэт дьэҥкэ – аһылык туттуллар болдьоҕо ааспатын туһугар кыһаллаллар эбит. Сибиэһэй бородууксуйаны аҕалар буоланнар бэйэлэрэ туспа эрэсиимнээхтэр.
Ахсынньы 10 күнүттэн ылата, Кириэстээхтэн Мииринэйдииргэ арыый да уйуктаах бородуукта тиэйэр массыыналарга көҥүл бэриллэр. Оччотугар, маҕаһыын атыыта-тутуута тэтимнээхтик барыаҕа диэн эрэнэ саныыгын.
Мииринэй быйыл тыа бородууксуйатын быйаҥын дьаарбаҥкатын ыытара - боппуруос. Барытын хамсык мэһэйдээтэ. Аһылык тутахсыйан, Мииринэй ырыынага букатын «дьүдэйдэ».
Онон, «Татыйыына» фирма үлэтин-хамнаhын сабардамын кэҥэтэригэр баҕарабын.
Станислав Алексеев. Мииринэй куората. Ааптар хаартыската.
