Киир

Киир

Аммаҕа экологтар, уопсастыбаннай иниспиэктэрдэр уонна оҕолор көҕүлээһиннэринэн хомуллубут туһаттан тахсыбыт батарыайкалары куоракка анал сиргэ киллэрэн туттардылар. Бу кэнниттэн батарыайкалар Челябинскай куоракка хаттаан оҥоһуллууга барыахтара.



Аммаҕа туһаттан тахсыбыт батарыайкалары мунньуу аахсыйатыгар оскуолалар, уһуйааннар, эбии үөрэхтэһин тэрилтэлэрэ көхтөөхтүк кытталлар. Аахсыйаны көҕүлээччилэр батарыайкалар тулалыыр эйгэҕэ, киһи этигэр - хааныгар буортулаахтарын туһунан лиэксийэлэри ааҕаллар. Батарыайка араас эттиктэр дьайыыларынан үлэлиир электричествоны солбуйар, ол иһин уопсай бөххө мээнэ быраҕыллара көҥүллэммэт.

Амма 2

Манна баар сибиниэс бүөрү, ньиэрбэни, уҥуоҕу, кадмий тыҥаны, бүөрү, уртуут мэйиини, ньиэрбэни, никель уонна цинк тириини, щелочь салыҥнаах бүрүөҕэ охсуулаахтар. Оттон сыбаалкаҕа быраҕыллыбыт батарыайка сир аннынааҕы ууга тиийэн улахан иэннээх кырыһы, ууну киртитэр. Ол иһин экологтар хас биирдии дьиэҕэ хаппахтаах пластик иһиккэ, бааҥкаҕа биитэр хоппоҕо мунньалларыгар уонна Амма маҕаһыыннарыгар туттаралларыгар ыҥыраллар.

– Айылҕаҕа харыстабыллаах сыһыан барыта дьиэттэн саҕаланар. Уопсастыбанньыктар, уһуйааччылар, оҕолор, төрөппүттэр айылҕа харыстабылын иниспиэксийэтин кытта бииргэ үлэлиибит, өрөспүүбүлүкэҕэ ыытыллар араас аахсыйаларга кыттабыт.

Амма 3

Иниспиэксийэ биэрбит массыынатынан улуус үрдүнэн хомуллубут батарыайкалары хомуйан, куоракка тиэйэн киллэрэн «Юником» диэн маҕаһыыҥҥа туттардыбыт, онон Аммабыт айылҕатын буортулаабакка анал тутар сиргэ илдьэн сэмэй кылааппытын киллэрэбит. Дьон сылдьар сирдэригэр «Талба», «Махтал», «Западный», «Камелот» курдук маҕаһыыннарга биэс лиитэрэлээх иһиттэргэ батарыайкалары мунньуҥ диэн хаалларарбыт. Дьон манна дьиэлэриттэн аҕалан туттараллар, оскуолалар, уһуйааннар биирдиилээн дьон иниспиэксийэҕэ эмиэ аҕалаллар. Аахсыйаҕа кыттыбыт дьоҥҥо, оҕолорго барыларыгар махтанабыт. Хас биирдии олохтоох ити курдук айылҕаҕа харыстабыллаах сыһыанын көрдөрөн көмө буолара, бу аахсыйа сыл аайы салҕанара, дьон сылдьар уопсастыбаннай миэстэлэригэр анал урналар тураллара, куоракка тиэйэр массыыналар баар буолаллара наадалаах, - диэн этэр эдэр натуралистар ыстаансыйаларын педагога, уопсастыбаннай иниспиэктэр Александра Киренская.

Амма 4

 Алтана Артемьева.

Сигэтэ: https://xn--80aaaambpp4b1d.xn--p1ai/article/35940

Тарҕат:

Санааҕын суруй