Холобур, бу аҕыйах хонуктааҕыта Томпо улууһугар “Халыма-Нежданинка” муниципальнай суолу улуус дьаһалтата уонна оройуон Сэбиэтин дьокутааттара приватизация былааныгар туруорбуттара билиннэ.
Манна ким интэриэһэ баара сэрэйиллэр эрэ: бу суолунан Кипр оффшоругар регистрациялаах “Полимет” монополист хампаанньа кэлэр-барар. “Нежданинка сабыллыбыта ыраатта, ити суол кимиэхэ наадалаах үһүнүй?!” диэн саҥа-иҥэ иһиллэр. Нежданинка сабыллыбытын да иһин, сир баайдаах учаастактар баар буоллахтара.
Аны, бу диэки кыыл-сүөл, күндү балык арааһа. Олохтоохтор манна бултуу-балыктыы кэл эллэр. Оттон арай суолу приватизациялаатыннар? Шлагбаумтан иҥнэр буоллахпыт. Онон, Ил Түмэн дьокутаата Иван Шамаев Томпо оройуонун баһылыгар маннык ыйытыы-сурук киллэрдэ.
СӨ “Томпо оройуона” МТ баһылыгар
Я.И. Степановка
2018 сыл олунньу 20 күнэ.
Ытыктабыллаах Яков Иннокентьевич!
СӨ “Томпо оройуона” МТ официальнай саайтыгар Томпо оройуоннааҕы Сэбиэтин III cиэссийэтин 2017 сыл ахсынньы 27 күнүнээҕи 25¹-дээх быһаарыыта тахсыбыт. Онно 2016-2018 сылларга «Томпо оройуона» МТ приватизациялыахтаах муниципальнай баайын-дуолун испииһэгэ онно киирбит саҥа уларыйыылар бааллар.
Бу испииһэккэ 13 №-нэн «Халыма –Нежданинскай» суол киирбит. Чопчулаатахха, массыына сылдьар суолун 577-с килэмиэтирэ. “Халыма – Нежданинскай” суол уопсай уһуна 98,2 км., итини кытта 1 243 235 кв. миэтэрэлээх сир учаастага – барыта уопсайа 94 681 000 солк. суумаҕа сыаналаммыт.
Ол эрэн оройуон баһылыга Хаандыга бөһүөлэгин олохтоохторун кытта көрсүһүүгэ «Халыма» федеральнай тыраассаттан Нежданинкаҕа диэри суолу оройуон дьаһалтата кырдьык атыылаары гынар дуо?» диэн ыйытыыга эн «Ол – сурах эрэ» диэн хоруйдаабыккын.
Дьикти балаһыанньа үөскүүр: Томпо оройуоннааҕы Сэбиэтэ нэһилиэнньэ олоҕор суолталаах быһаарыы таһаарар, оттон баһылык ол туһунан билбэт.
Манан сибээстээн, мин бу боппуруоһу үөрэтэргитигэр уонна маннык ыйытыыларга хоруйдуургутугар көрдөһөбүн:
- «Халыма-Нежданинскай» муниципальнай суол 577-с килэмиэтирин атыылыыр былаан уопсастыбаннай дьүүллэһиигэ турбута дуо?
- 2017 сыл ахсынньы 27 күнүгэр буолбут Томпо оройуоннааҕы Сэбиэтин мунньаҕар бу муниципальнай суолу атыылыыр туһунан боппуруоска куоластааһын буолбута дуо?
- Муниципальнай суолу атыылааһын туһунан СӨ Бырабыыталыстыбатын кытта сөбүлэһиннэрии ыытыллыбыта, ылыллыбыта дуо? Онуоха туох докумуоннар баалларый?
Итини кытта миэхэ маннык докумуоннары көрдөрөргүтүгэр көрдөһөбүн:
- «Халыма–Нежданинскай» суол 577 килэмиэтэрин сыанатын оҥоруу матырыйаалларын.
- 2017 сыл ахсынньы 27 күнүгэр бу муниципальнай суолу атыылыырга быһаарыыны ылбыт Томпо оройуоннааҕы Сэбиэтин мунньаҕар сылдьыбыт дьокутааттар испииһэктэрин.
- «Халыма–Нежданинскай» суол 577 килэмиэтэрин муниципальнай баай-дуол испииһэгэр киллэрбит куоластааһын боротокуолун.
Бу боппуруостарга хоруйдуургутугар уонна суругу тутуоххутуттан эппиэти 5 үлэ күнүнэн биэрэргитигэр көрдөһөбүн.
Ытыктабылы кытта,
норуот дьокутаата И.И. Шамаев.
