Уһук Илиҥҥэ Саха сирин нэһилиэнньэтэ олох кээмэйин 70 сааһын куоһарбыт соҕотох эрэгийиэнинэн буолбут.
Нэһилиэнньэ олоҕун уһааһына бүтүн комплекснай үлэ түмүгэр тахсар. Бастатан туран – доруобуйа харыстабылын сайыннарыыттан. Ааспыт сылга Ил Дархан аҕа саастаах дьоҥҥо мэдиссиинэ көмөтүн судургутарга уонна үс таһымнаах мэдиссиинэ көмөтүн киллэрэргэ сорудаахтаабыта. Билигин гераитрия учаастактара уонна кэбиниэттэрэ киин куоракка, Мэҥэ Хаҥаласка, Хаҥаласка уонна Нам улуустарыгар тэриллэн үлэлии олороллор. Быйыл маннык кэбиниэттэр уонна учаастактар Алдан, Нерюнгри, Ленскэй уонна Мииринэй улуустарыгар арыллыахтара. Инньэ гынан, аҕа саастаах дьон анал эмтэниини ылар кыахтаныахтара. Өскөтүн урукку өттүгэр маннык көмөнү өрөспүүбүлүкэтээҕи гериатрия киинигэр эрэ ылар эбит буоллахтарына, билигин бу хайысха кэҥээн, миэстэтигэр көмөнү ылар кыахтаналлар. Салгыы маннык гериатрия анал кэбиниэттэрэ элбээн иһиэхтэрэ.
Маны таһынан, сытар балыыһаларга гериатрия салаалара тэриллэллэр. Кинилэр 60 саастарын ааспыт ыарыһахтарга кырдьыыны кытары сыһыаннаах ыарыылары бохсуохтара уонна атын стационартан көһөрүллүбүт ыарыһахтары реабилитациялыыр буолуохтара. Билигин маннык отделение Гериатрия киинигэр, Мугудайдааҕы балыыһаҕа (Чурапчы) уонна Аллараа Бэстээх (Мэҥэ Хаҥалас) балыыһаларыгар үлэлии олороллор. Быйыл кырдьаҕастарга анал куойка өрөспүүбүлүкэтээҕи харах балыыһатыгар, Болугур улуустааҕы балыыһатыгар (Амма), Мииринэйдээҕи киин балыыһаҕа, Мохсоҕоллоохтооҕу улуустааҕы балыыһаҕа (Хаҥалас) уонна Нерюнгри, Алдан, Ленскэй оройуоннарыгар арыллыахтара.
Былырыын от ыйыгар Гериатрия өрөспүүбүлүкэтээҕи киинигэр теле-мэдиссиинэ пууна арыллыбыта. Онно биэс ый иһигэр улуустан номнуо 600 ыарыһаҕы көрөн сүбэлээбиттэр.
Кэлэр уон сыл устата дойду үрдүнэн үлэлиир кыахтаах нэһилиэнньэ ахсаана үксүөхтээх, маныаха 80 саастарын ааспыт дьон ахсаана биллэ элбиирэ былааннанар. Инньэ гынан, судаарыстыба бу дьоҥҥо социальнай бэлиитикэни тупсарар соругу туруорар. Бэрэсидьиэн Владимир Путин бэйэтин илдьитигэр нэһилиэнньэ олоҕо тупсарыгар уонна нэһилиэнньэ орто сааһа улаатарыгар ураты болҕомто ууруллуохтаах диэн тоһоҕолообута. Путин “аҕа саастаах дьоҥҥо ураты болҕомтону ууруу – ытык иэспит” диэн бэлиэтээбитэ.
