Саха норуодунай суруйааччыта, поэт, прозаик, тылбаасчыт, “алта нэһилиэк уола”, Семён Титович Руфовы ахтар-кэриэстиир тэрээһин
Тэрийээччилэр: СӨ норуодунай суруйааччыта С.Т. Руфов уонна кини кэргэнэ Арассыыйа үөрэҕин туйгуна М.С. Арбыкина ааттарын үйэтитэр пуонда, “Тамалакаан нэһилиэгэ” муниципальнай тэриллии, СӨ Суруйааччыларын сойууһа, Үөһээ Бүлүү улууһун Аҕаларын сүбэтэ.
Тэрээһин спонсордара: СӨ Айылҕа харыстабылын министиэристибэтэ, “Бичик” КНК, “Ситим” медиа бөлөх; “ЖКХ “Губинский” ХЭТ; “Техноавиа-Саха” ХЭТ; “Бадаар” маҕаһыын (бас дириэктэр С.П. Бурцев, Уус-Алдан улууһа), “Ситим” маҕаһыын (бас дириэктэр З.И. Сивцева, Чурапчы улууһа), “РуфовБизнесКонсалт” ХЭТ.
-
С.Т. Руфов “Улуу мунду” айымньытыгар уонна Аҕа күнүгэр анаан ыытыллар “Улуу мунду” куйуур күрэхтэһиитэ.
Ыытыллар сирэ, күнэ: Тамалакаан нэһилиэгэ, Тыымпы алаас, муус устар 1 күнэ, 11.00 чаастан.
Соруга:
- төрүт дьарыкпытын сөргүтүү, кэлэр кэнчээри ыччакка кэрэхсэтии;
- саха төрүт аһын киэҥ эйгэҕэ таһаарыы;
- дьиэ кэргэҥҥэ, дьоҥҥо-сэргэҕэ аҕа аатын өрө тутуу;
- чөл туруктаах олоҕу тутуһууну тарҕатыы.
Кыттааччылар: аҕа уолунаан, оҕото оскуола үөрэнээччитэ буолуохтаах, сааһыттан тутулуга суох.
Көрүҥнэрэ:
- анньыынан ойбон алларыы;
- саамай улахан мунду;
- элбэх балык.
Бу күрэхтэһиигэ суперприз быһыытынан мотуордаах 2 миэстэлээх ПВХ тыы уонна көрүҥнэринэн бириистэр туруохтара.
Ону таһынан мундуттан ас эгэлгэтин оҥорон, буһаран аҕалыы күрэхтэһиитэ ыытыллыаҕа. Баҕалаахтарга хаарга куобахтааһын, сүүрүү тэриллиэҕэ.
Күрэхтэһээччилэр туттар тэриллэрин, биирдэ аһыыр ыһыктарын илдьэ кэлэллэр.
-
С.Т. Руфов “Дьээбэтинньик” кинигэтинэн “Балык үөстээх, киһи үөннээх” көр-күлүү күрэхтэһиитэ.
Күрэхтэһии ыытыллар сирэ, күнэ: Тамалакаан нэһилиэгин кулууп дьиэтэ, муус устар 1 күнэ, 16.00 чаастан.
Соруга:
- суруйааччы С.Т. Руфов көрдөөх-күлүүлээх, уус-уран, сытыы тылын үөрэтии, чинчийии, ааҕааччы киэҥ араҥатыгар тарҕатыы;
- талааннаах, сытыы тыллаах-өстөөх дьону булуу, арыйыы;
- айылҕа уһуктуутун туойуу-алҕааһын.
Кыттааччылар: улахан дьон, ону сэргэ оскуола орто уонна улахан сүһүөх кылаастарын үөрэнээччилэрэ.
С.Т. Руфов көр-күлүү жанрыгар суруйбут айымньыларынан сценкалар, монологтар, инсценировкалар.
Кыттааччылар иккилии нүөмэри көрдөрөллөр. Биир — С.Т. Руфов айымньытынан, иккис — көҥүл тиэмэ. Нүөмэр 5 мүнүүтэттэн уһуо суохтаах.
Түөрт строкалаах хоһоону тута айыыга (экспромт) күрэхтэһии буолуоҕа.
Күрэхтэһиилэри суруйааччылар дьүүллүүллэр.
Үс бастаабыттар уонна анал ааты ылбыттар дипломнарынан, анал бэлиэлэринэн, сыаналаах бириистэринэн наҕараадаланыахтара.
Сайаапкалары олохтоох дьаһалтаҕа маннык нүөмэргэ биэрэҕит: 8-41133-286-27.
Тэрийэр хамыыһыйа.
