Кулун тутар 21-23 күннэригэр “Олоҥхо дойдутун прессата” диэн СМИ үлэһиттэрин V бэстибээлэ буолан ааста.
Бэстибээл чэрчитинэн маастар кылаастар, төгүрүк остуоллар, дьыалабыай кэпсэтиилэр, психологическай тириэниннэр, быыстапкалар, лиэксийэлэр, мастарыскыайдар, пресс-туурдар тэрилиннилэр. Улуустан кэлбит суруналыыстарга босхо мэдиссиинэ көрүүтэ ыытылынна. Маны таһынан, айар куттаах суруналыыстар кэллиэксийэлэрин быыстапката дьон болҕомтотун тарта. СМИ үлэһиттэрин икки ардыгар үгэс буолбут мас тардыһыыга өрөспүүбүлүкэтээҕи турнир ыытылынна. Бэстибээли Саха сирин суруналыыстарын Сойууһа (бэрэссэдээтэл Г.А.Бочкарева) уонна СӨ Сибээс уонна информационнай технологияларыгар министиэристибэтэ тэрийэн ыыттылар.
Москубаттан ыҥырыылаах ыалдьыт, Арассыыйа Суруналыыстарын Сойууһун сэкирэтээрэ, “Журналистика и медиарынок” сурунаал сүрүн эрэдээктэрэ В.Л. Касютин олус туһалаах лиэксийэлэри ыытта.
Бэстибээл бүтэһик күнүгэр, Саха сирин Суруналыыстарын Сойууһун бэрэссэдээтэлэ Галина Бочкарева биэс сыллаах үлэтин түмүгүн отчуоттаата. Таарыйа эттэххэ, Саха сирин Суруналыыстарын Сойууһа биһиги өрөспүүбүлүкэбитигэр эрэ буолбакка, Уһук Илиҥҥэ саамай бөдөҥ айар холбоһук буолар. Галина Алексеевна таһаарыылаах үлэтин үрдүктүк сыаналаатылар уонна салгыы саҥа болдьоххо таллылар.
Александр Назаров хаартыскалара
