Өрөспүүбүлүкэҕэ муус устар маҥнайгы өрөбүлүгэр Аҕа күнүн бэлиэтиибит. Бу бырааһынньык бастакы бэрэсидьиэн М.Е. Николаев ыйааҕынан 1999 сыллаахха олохтоммута. Онтон 2017 сылтан Ил Дархан уурааҕынан ый иккис баскыһыанньатыгар уол оҕо күнэ бэлиэтэнэр буолбута.
Эр киһи оруолун уопсастыбаҕа үрдэтэр сыаллаах ыытыллар тэрээһиннэри СӨ Ыччат дьыалатыгар уонна дьиэ кэргэн бэлиитикэтигэр министиэристибэ салайар. Маны таһынан, өрөспүүбүлүкэ министиэристибэлэрэ бу күҥҥэ туһуламмыт үөрүүлээх тэрээһиннэри тэрийэр соруктаахтар.
Быйыл “Аҕа күрэҕэ -2018” өрөспүүбүлүкэтээҕи тэрээһин Мэҥэ Хаҥалас улууһун 2-с Наахаратыгар муус устар 5-6 күннэригэр буолуоҕа. Онтон уолаттарга аналлаах сүрүн бырааһынньык муус устар 7 күнүгэр Саха национальнай гимназиятыгар ыытыллыаҕа.
Маны таһынан, хас биирдии муниципальнай тэриллиилэр анал бырагырааманан үөрүүлээх көрсүһүүлэри тэрийиэхтэрэ.