“Хатан” сурунаал тэриллибитэ 10 сылыгар аналлаах тэрээһин “Сосновый бор” сынньанар уонна чэбдигирэр кииҥҥэ (дир. Иванова Я.Н.) кулун тутар 30 к. буолан ааста. Сүүс оҕо, салайааччы, учуутал, төрөппүт кэлэн үөрүүбүтүн үллэстэн, өттүк харалаах, илии тутуурдаах, элбэҕи билэн-көрөн, дуоһуйа сынньанан бардылар.
5 сиэксийэ ирэ-хоро үлэлээтэ: “Сахабиикипиэдьийэ” (сал. Н.Н. Павлов-Халан), “Кыым.ру” (сал. Д.С. Иванов), “Бэлэм буол+” (кэрэспэдьиэннэр А. Аргунова, С. Маркова), “Робототехника” (сал. Дь.Р. Осипов) уонна Францияттан мусукаан, учуутал, суруйааччы Ж.-М. Шеври айар бөлөҕө. Салайааччыларга сүбэ-ама сэминээрин сүрүн эрэдээктэр Е.Р. Николаев ыытта. Аныгы сахалыы суруналыыстыка, саха тыла интэриниэккэ төһө тэтимнээхтик киирэрин туһунан, наука саҥа хардыылара, муусука алыптаах дорҕоонноро бу сиэксийэлэргэ иһилиннэ. “Хатан” дьоро күнүн кэлэн киэргэттилэр: “Dance Generation” үҥкүү оскуолатын эрчимнээх үҥкүүһүттэрэ, Ж.-М. Шеври, Тома Оберже уонна, биллэн турар, эдэр кэрэспэдьиэннэр бэйэлэрэ: аангылыйалыы хоһоон, дэйбиирдээх үҥкүү, хоһоон, хомуска дьүһүйүү, С.И. Тарасов аатынан Өрт орто оскуолатын видеоэҕэрдэлэрэ, о.д.а.
“Сосновый бор” “Түһүлгэ” диэн киэҥ саалатыгар былырыын биллэриллибит биэс күрэс түмүгэ таҕыста, кыайыылаахтарга бириистэри туттардылар.
“Мин сахалыы аатым – мин киэн туттуум” күрэскэ 420-чэ оҕо кыттыбыта. 1-гы миэстэлээхтэргэ СӨ Бырабыыталыстыбатын ЗАГС Управлениетын салайааччытын 1-гы солбуйааччыта Туйаара Револьевна Такасаева ЗАГС анал бириистэрин туттарда. Санатар буоллахха, быйыл ЗАГС тэриллибитэ 100 сылын туолар. Онон бу күрэс үрдүк таһымҥа ааста. Бириистэрэ да араас: “Бичик” сэртипикээттэрэ, “Хатан” таһаарбыт “Үс, икки, биир” остуоруйа кинигэтэ, “Якутия” аккырыыкка кэмпилиэгэ, “Хатан сурунаал библиографическай ыйынньыга”, “Муус пааркаҕа” киирии билиэт, о.д.а.
“Оҕо саас алыптаах киистэтэ” (120-чэ үлэ киирбитэ) диэн саха суруйааччыларын айымньыларыгар иллюстрация күрэһин эрэдээксийэ Саха сирин худуоһунньуктарын сойууһа (бэр. В.Н. Амыдаев) тэрийсэн ыытта. Кыайыылаахтар Худуоһунньуктар Дьиэлэригэр экскурсиялыыр, П.П. Романов ойуулуур-дьүһүннүүр училищетыгар уруһуйдуур кууруска үөрэнэр сэртипикээттэри, кырааска нобуорун, о.д.а. бириис туттулар.
“Эрдэҕэс саастарбыт кэпсээннэрэ” диэн обургу оҕолорго анаан кэпсээн суруйуутугар кыралыын-улаханныын эмиэ 100-тэн тахса айымньы киирбитэ. Дьүүллүүр сүбэ – Суруйааччылар Ассоциацияларын салайааччыта Олег Сидоров, суруйааччылар Аита Шапошникова, Борис Павлов – кыайыылаахтарга харчынан бириис анаабыттарын кэлин дьоһуннаан туттарыы буолуоҕа. Биһирэм бириискэ, кыайыылаах оҕолорго сурунаал бэйэтин анал бириистэрин туттартаата.
“Бастыҥ пресс-киин” күрэс түмүгүнэн 3 м. “Мэҥэбил” (В.П. Ларионов аатынан Майа орто оскуолата, сал. И.Я. Романова), 2 м. “Чараҥ” хаһыат (Хара Алдан, Таатта, сал. О.П. Егорова, А.Г. Бочурова), 1 м. “Сыккыс” хаһыат (Дьокуускай к. 23 №-дээх орто оскуолата, сал. Гаврильева Вера Святославовна) ыллылар. Кинилэргэ “Сосновый бор” кииҥҥэ күһүҥҥү-кыһыҥҥы солбукка (смена) 5-тии путевканы Киин дириэктэрин солбуйааччы В.П. Бетюнская үөрүүлээх быһыыга-майгыга туттарда. Биһирэм бириистэргэ тигистилэр – “Кыымчаан”, Искра, Нам. Сал. Парникова Иванна Башариновна; “Хатыҥчаан” пресс-киин, Сунтаар 3 №-дээх орто оскуолата; “Переменка” нууччалыы-сахалыы хаһыат, Орто Халыма орто оскуолата. Кинилэр “MOST MEDIA” диэн оҕо телевизионнай устуудьуйатыгар куурус ааһарга сэртипикээт туттулар.
Ону таһынан “Бастыҥ эдэр кэрэспэдьиэн суруга”, “Хаартыска элбэҕи кэпсиир”, “Бастыҥ инфографика”, “Саҥа рубрика” диэн хайысхаларга кыайбыт оҕолор кинигэ атыылаһар (“Бичик” кинигэ кыһата), баттах кырыйтарар (Кирилл Куорсун “Мой мастер” парикмахерскайга, Дьокуускай к.), фотосессияҕа (фотограф Александр Васильевич Назаров) сэртипикээттэри бэлэх туттулар.
Бэлиэ күнү сылайбакка-элэйбэккэ, бэрт айымньылаахтык сыһыаннаһан “Хотугу сулус” телерадиоакадемия (сал. Т.А. Гоголева) айар кэллэктиибэ – эрэдээктэр Татьяна Апросимова, Тааттаттан эдэр кэрэспэдьиэннэр Даяна Тоскина, Алина Иванова, оператор Евгений Лугинов – тэрээһини уһуллулар. Бэрт сотору сахалыы ханаалбытыгар көстүө диэн эрэнэ күүтэбит.
Маннык тэрээһин бигэ тирэҕэ суох барбат. “Сосновый бор” иллээх кэллэктиибигэр, “Dance Generation” үҥкүү оскуолатыгар, “Бэлэм буол+” эрэдээксийэтигэр, “Ситим” медиа-бөлөх генеральнай дириэктэрэ М.Н. Христофороваҕа, сүрүн буҕаалтыр С.В. Филипповаҕа, кэнсиэрт нүөмэрин бэлэмнээбит оҕолорго, сиэксийэлэри ыыппыт айар-тутар дьоҥҥо, “Хотугу Сулус” телерадиоакадемия эрэдээктэрэ С.С. Лебедеваҕа уо.д.а. барҕа махталбытын биллэрэбит! Сахалыы оҕо бэчээтэ сайда, туругура турдун!
Бэй.кэр.
