Арассыыйаҕа “өлүү” саамай улахан көрдөрүүтэ Псков уобалаһыгар бэлиэтэммит. Салгыы “саамай өлүүлээх куораттарга” Псков (1 тыһ. киһиттэн 17,4 түбэлтэ), Новгород (17,1), Тверь (16,9), Тула (16,5), Иваново (15,8) киирэллэр. Көстөрүн курдук, бу бары төрөөһүн муҥутуурдук аччаабыт, нэһилиэнньэтэ олус кырдьыбыт нуучча эрэгийиэннэрэ.
Саамай аҕыйах “өлүүлээх” эрэгийиэннэргэ Ингушетия (1 тыһ. киһиттэн 3,2 түбэлтэ), Чечня (4,6), Ямал-Ненец уокуруга (4,9), Дагестан (5,1), Ханты-Манси уокуруга (6,2) киирэллэр. Санаттахха, өлүү бырыһыана нэһилиэнньэ төһө баайдык-дьадаҥытык олороруттан тутулуга суох. Нэһилиэнньэ эдэр, элбэхтик төрүүр-ууһуур эрэгийиэннэригэр өлүү-сүтүү бырыһыана кыра буолар.
Уопсайынан, 2017 сылга дойду үрдүнэн 1,9 мөл. киһи өлбүт. Ити, 2016 с. тэҥнээтэххэ, 63,6 тыһ. киһинэн аҕыйах.
