Соторутааҕыта "Көмүлүөк" саха иhитин оҥорор хампаанньа үлэhиттэрэ сахалар биир саамай тумус туттар киhибитин - Мандар Ууhу - кытта көрсүhүү тэрийэн, хас эмит сыллаах ыра санаалара туолан астынан, ытык киhиттэн алгыс ылан, саҥалыы тыын киллэринэн үлэлээн-хамсаан эрэллэр. Борис Федорович "Көмүлүөктэр" үлэлэлэрэ күөстүү оргуйа олорор, тэрилтэлэрин тэбэр сүрэҕэр, иhиттэрин оҥорор мастарыскыайдарыгар, кэлэ сырытта. Манна кини этэр тылын барытын сыыска-буорга түhэрбэккэ истэ-иҥэринэ, "Көмүлүөк" бары худуоhунньуктара, маастардара, атыыhыттара, сүрүннүүр идэлээх менеджердэрэ сырыттылар. Ытык киhи ис-иhиттэн сырдаан, аан бастакыттан хайдах эрэ ураты ылыннарыылаахтык, барыларын аҕалыы амарах тылынан алҕаан киирбититтэн көрсүhүү истиҥ-сылаас эйгэҕэ барда. Аатырбыт ууспут хампаанньа оҥорор бородууксуйатын, улэ уопсай тэрээhинин, маастардар айар-тутар ньымаларын көрдө-иhиттэ. Уонна наhаа сэргээтэ, элбэх сүбэ-ама биэрдэ, дьон долгуйар, мунаарар ыйытыытыгар хоруйдаата. Онтон үлэhиттэр астынан, үөрүүлэрэ үрдээтэ, санаалара бөҕөргөөтө.
Изольда Иванова – маҕаһыыннар администратордара:
- Тумус туттар киһибит Борис Федорович Неустроев-Мандар Уус биһиэхэ, "Көмүлүөк" үлэһиттэригэр, олус интэриэһинэй кэпсээннээх кэлэн сэhэргээн, ыалдьыттаан барда. Этэргэ дылы хас биирдии үлэhиккэ сахалыы тыыны киллэрэн-иҥэрэн, салгыы үлэлииргэ кынаттаата. Кини сүбэтин-аматын айар үлэбитигэр туhаныах тустаахпыт. Төрүт үгэспитин умнубакка, өбүгэлэрбит дьарыктарын, күннээҕи олохторун-дьаhахтарын, туттар тэриллэрин, иhиттэрин-хомуостарын чинчийэн, үөрэтэн билиэххэ наада. "Былыргы иһити, малы хас биирдии киhи бэйэтин илиитинэн тутан-хабан көрдөҕүнэ эрэ сүрэҕэр иҥэрэр" диэн олох сөптөөх этиини эттэ. Ойуу-бичик суолтатын, хайдах, ханна туттуллуохтааҕын сүрдээх хомоҕойдук быһаарда, саха киhитэ айылҕаны кытта алтыhыахтааҕын, айылҕаттан күүс ылыахтааҕын туhунан кэпсээтэ. Инникитин кини сүбэтин-аматын айар үлэбитигэр туhаныахпыт диэн бигэ эрэнэбин!
Ньургустана Петрова – деколист:
- Борис Федорович Неустроевы-Мандар Ууһу кытта көрсүһүү дириҥ силистээх-мутуктаах буолла. Биһиги айар үлэбитигэр, дьарыкпытыгар Мандар-Уус санааларын ситимэ, сүбэтэ-амата күүс-көмө буолуохтара дии саныыбын. Борис Федорович этэринэн, үлэ сүрүн тосхоло Бүтүн Билиигэ, Ийэ тылга, Уһуйууга сытар. Биһиги үлэбит сыаналанарыгар, баҕаран туран дьарыктанарбытыгар, хас биирдиибит дьоҕура, талаана арылларыгар, сүрэхпитинэн ылынан уонна ону өйбүтүнэн айар үлэбитигэр туттарбытыгар эбии сахалыы тыын, күүрээн, көтөҕүллүү наада диэни сэргээн иһиттим.
Юлия Иванова – худуоһунньук:
- Улуу Мандар Ууhу илэ харахпынан көрбүппүттэн олус үөрдүм. Сүрдээх эйэҕэс, элэккэй киhи эбит. Истиҥ көрсүhүү буолан ааста диэн астына санаатым. Үлэлиирбитигэр саҥа күүс, иэйии биэрдэ диэххэ наада уонна туhалаах сүбэ-ама биэрдэ. Сахалыы тыын, күүс хантан ыларбытын ыйан-кэрдэн биэрдэ. Айар үлэбититтэн хайҕаммыппытыттан астынным.
Альбина Спиридоновна Яковлева – деколист:
- Мунаахсыйар боппуруостарбар, ордук харысхал, оһуор суолтатыгар наадалаах хоруйу, сүбэни иһиттим дии санаатым. Олус кэмигэр, миэстэтигэр сөптөөх көрсүһүү буолан ааста. Инникитин да маннык көрсүһүү, санаа атастаһыыта буола турара буоллар диэн баҕа санаалаахпын.
Агафья Иванова – консультант:
"Отой киэҥ-холку, туһунан көрүүлээх, айылҕаттан айдарыылааҕа биллэр, сээркээн сэһэнньит, олоҕу көрүүтэ киэҥэ билэрэ-көрөрө элбэҕэ сөхтөрдө. Сахатын омугун иhитин-хомуоhун, туттар сэбин-сэбиргэлин, оhуорун-мандарын, культуратын билэрэ киhини кэрэхсэтэр. Наhаа интэриэһинэй, киhи кинини кытта төhө баҕар сэлэhэ олоруон сөп. Наhаа астынным. Хааhахтан хостоон кэпсии олоруох курдук баай тыллаах ураты кырдьаҕас эбит. Кини үлэтэ, билбитин-көрбүтүн дьонугар-сэргэтигэр киэҥ эйгэҕэ таhаарарара бу омук сайдыытын историятыгар бараммат баай буолар.
Билигин сахалыыны соччо сэҥээрбэт, атын омук биhиги төрүт, удьуор дьарыкпытын харыстыырбытын талбытынан ыскайдыырын көмүскэhэр аймалҕаннаах кэмҥэ саха санаалаах онтон дьиксинэ сырыттаҕына, " Көмүлүөк" сылаас холумтанын тула Улуу Мандар кэлэн дьону түмпүтэ, эппитэ-тыыммыта айарга-тутарга кынаттыыр, эрэли, эрчими эбэр.
