Бу күннэргэ анал хамыыһыйа “Территория АЛРОСА” социальнай бырайыак куонкуруһун кыайыылаахтарын быһаарда. Ол иһигэр Мииринэй, Удачнай куораттар, Светлэй, Чернышевскай уонна Айхал бөһүөлэктэр бырайыактара киирдэ. Хас биирдии бырайыак Мииринэй улууһугар социальнай инфраструктураны, үөрэх тиһигин тупсарарга, ыччат айар дьоҕурун көҕүлүүргэ уонна арыйарга, успуорду уонна чөл олоҕу өйүүргэ анаан оҥоһуллубут. Ити бырайыактар олоххо киирэллэригэр хампаанньа барыта 45 мөлүйүөнтэн тахса солкуобайы биэриэхтээх.

Бу куонкурус “Народный актив” бырайыак көҕүлээһининэн тэриллибитэ. Сүрүн соруга – олох таһымын үрдэтии, аныгы уонна табыгастаах уопсастыбаннай-култуурунай эйгэлэри тэрийии. АЛРОСА хампаанньа мантан антах бастыҥ бырайыактары олоххо киллэрэргэ сыл аайы 50-чалыы мөлүйүөн солкуобайы биэрэр буолуоҕа.

“Народный актив” бырайыак салайааччыта Александр Басыров кэпсииринэн, быйыл куонкуруска муниципалитеттартан, үөрэх кыһаларыттан уонна уопсастыбаннай тэрилтэлэртэн барыта 20 сайаапка киирбит. “Бырайыактар куонкуруска киириэхтэрин иннинэ нэһилиэнньэ ортотугар барыллаан талар-куонкуруһу ааспыттара. Араас хабааннаах социальнай ыйытык оҥоһуллубута. Онон Мииринэй улууһун дьоно-сэргэтэ “чахчы, наадалаах” диэн өйөөбүтэ”.

Кыайыылаах 8 бырайыак

1. “Надежда” ЦДО” МБУ ДО “Про-движение” диэн идэни таларга көмөлөһөр медиа-киини тэрийэр бырайыага. Бырайыак оскуола оҕолоро идэлэрин талалларыгар көмө-тирэх, сүбэ-ама буолар аналлаах. Кини көмөтүнэн оскуола оҕолоро улуус тутаах тэрилтэлэрин үлэтин-хамнаһын билсиэхтэрин, билигин ордук туох-ханнык идэлээх дьон наадаларын, үөрэх кыһаларын, о.д.а. туһунан билиэхтэрин сөп.

2. Мииринэйдээҕи тэхиниичэскэй колледж аныгы ирдэбилгэ эппиэттир түөрт мастарыскыайы тэрийэр бырайыага. Ол курдук, АЛРОСА хампаанньа колледж “Электрослесарь подземный” мастарыскыайга анал оборудованиены уонна күннээҕигэ туттуллар матырыйаалы, оттон “Промышленная робототехника” мастарыскыайга “Промобот” диэн робототехникаҕа үөрэнэр комплексы атыылаһарга көмөлөһүөҕэ. Итини таһынан, силиэсэрдэри сир анныгар үлэлииргэ үөрэтэр VR-тренажёр оҥоһулларыгар кыттыһыаҕа.

3. “Светлэй бөһүөлэгэ” муниципальнай тэриллии эрчиллэр сааланы тэрийэр бырайыага. Бу иннинэ бөһүөлэккэ нэһилиэнньэ бүттүүн эрчиллэр саалата суоҕа. Онон бырайыак көмөтүнэн бастакы саала тутуллуоҕа.

4. “Айхал бөһүөлэгэ” муниципальнай тэриллии “Здоровье” паарканы тупсарар бырайыага. Ол курдук, АЛРОСА көмөтүнэн бөһүөлэк пааркатыгар оҕо былаһааккалара тутуллуохтара, дьон-сэргэ сынньанар сирдэрэ тэриллиэхтэрэ, салгыҥҥа эрчиллэр тренажердар оҥоһуллуохтара, кафелар, араас хабааннаах тэрээһини ыытар, кэнсиэрдиир сыана баар буолуоҕа.

5. “СӨ Мииринэй улууһун буоксаҕа федерацията” МОО буоксаҕа сыһыаннаах успуорт тэрээһинин тэрийэр бырайыага. Бу бырайыак чэрчитинэн, СӨ Мииринэй улууһун буоксаҕа федерациятын базатыгар успуорт уонна сынньалаҥ кластера арыллыаҕа. Кини көмөтүнэн оскуола оҕолоро уонна олохтоох нэһилиэнньэ эт-хаан өттүнэн сайдыахтаах, чөл туруктаныахтаах. Үүнэр көлүөнэ патриоттуу тыыҥҥа иитиллиэхтээх, спортсменнар буоксаҕа ситиһиилэрэ элбиэхтээх. Ити барыта олоххо киирэрин туһугар, эрчиллэр оборудованиелар атыылаһыллыахтаахтар, тириэньэрдэр уйулҕа технологияларыгар, аныгы үөрэтэр ньымаларга үөрэниэхтээхтэр, спортсменнар күрэхтэһиилэргэ, сүүмэрдиир тэрээһиннэргэ кыттыахтаахтар.

6. “Удачнай куорат” муниципальнай тэриллии киин болуоссаты саҥардар, тупсарар бырайыага. Бу бырайыагы СӨ Ил Дархан архитектураҕа уонна куораты тутууга управлениета бэлэмнээбитэ. Болуоссакка саҥа түрүбүүнэлэр, сарайдар, “Удачнай” диэн 3Д-суруктаах, хачыаллаах, сибэкки олордор иһиттэрдээх арт-эбийиэк баар буолуохтаах. Болуоссакка саҥа тротуар билиитэлэрин тэлгэтиэхтэрэ, доруобуйаларыгар хааччахтаах дьон сылдьарыгар анаан пандустары оҥоруохтара.

7. “Чернышевскай бөһүөлэгэ” муниципальнай тэриллии Космонавтов уулуссаттан Гидростроителей уулуссаҕа диэри сатыы дьон сылдьар суолун оҥорор, дьон доруобуйатыгар куттал суоһаабатын хааччыйар табыгастаах эйгэни тэрийэр бырайыага.

8. Мииринэй улууһун массыыналаах уонна матассыыкыллаах дьонун “Байанай” уопсастыбаннай тэрилтэтин мототерапияҕа анаммыт бырайыага. Бу бырайыак чэрчитинэн, уопсастыбаннай тэрилтэ кыттыылаахтара КДН учуотугар турар обургу оҕолору кытта үлэлэһиэхтэрэ. Ол иһигэр “Доверие” киин психологтара анал трениннэри ыытыахтара, тириэньэрдэр оҕолорго мотокроһу үөрэтиэхтэрэ. Бырайыак көмөтүнэн оҕолор бэйэ күүһүгэр эрэнэр-итэҕэйэр буолуохтара, эрэллээх доҕоттору, настаабынньыктары булуохтара, чөл олоххо сыстыахтара, суолга сэрэхтээх буоларга үөрэниэхтэрэ. Кэлин ити ылбыт билиилэрэ тиэхиньикэни кытта үлэлииллэригэр көмө буолуохтаах.

Бу аҕыс бырайыак бүттүүн сыаната 167 мөлүйүөн солкуобай буолар. АЛРОСА онтон 45 мөлүйүөн солкуобайынан биэрэр. Онон бырайыак ааптардара федеральнай уонна улуус бүддьүөттэриттэн 122 мөлүйүөн солкуобайы эбии буллулар, бэйэлэрин харчыларын уктулар. "Территория АЛРОСА” куонкурус буоларын туһунан аан бастаан Мииринэй куоракка “Будущее алмазных городов” сугулаан кэмигэр, быйыл муус устарга, биллэрбиттэрэ.

АЛРОСА пресс-сулууспатын
матырыйаалларынан.