Олунньу 27 күнүгэр Булуҥ улууһун Быковскай эбэҥки национальнай бөһүөлэгэр Алексей Колодезников салайааччылаах Бырабыытылыстыба отчуота буолан ааста. Олохтоохтору долгутар тыын кыһалҕа - нэһилиэккэ саҥа оскуола тутуута.
“Быковскай нэһилиэгэр уопсай 514 киһи олорор. Оҕо ахсаана сыл ахсын эбиллэн иһэр”, – диэн оскуола дириэктэрэ Гаврил Иванов бэлиэттир. Холобур, былырыын 76 оҕо оскуолаҕа үөрэнэр эбит буоллаҕына, быйыл 83. Оскуола 2015 сыллаахха Ил Дархан инновационнай үөрэхтээһин гранын кыайан 1 мөллүйүөнү, онтон 2016 сылга өрөспүүбүлүкэ үрдүнэн 96 агрооскуолаттан бириистээх миэстэҕэ тиксэн 500 тыһыынча солкуобайга тиксибит.
“Ааспыт сылга оскуолаҕа эбии сыһыарыы тутан, балыгы астыыр уонна ваакумнай хаҕы оҥорор саҥа тэриллэри туруорбуппут. Ону таһынан ыыһыыр оһоҕу атыыластыбыт. Инньэ гынан, оскуоланы бүтэрэллэригэр үөрэнээччилэр “рыболов-обработчик” диэн идэни уонна бурааны, квадроциклы ыытар быраабы ылан тахсаллар”, – диэн оскуола дириэктэрэ кэпсиир.
Үөрэнээччилэр балыгы астыыр сатабылларын отчуоттуу кэлбит бөлөххө көрдөрдүлэр. Быковскайга Лаптев муората, Неелово хомото баар буолан күндү балыгы астыырга бэрт тоҕоостоох. Инниктин оскуола астаабыт балыгын атыыга таһаарарыгар лицензия ылар баҕалаах.
Көрсүһүүгэ СӨ үөрэххэ уонна билимҥэ миниистирин бастакы солбуйааччы Эдуард Кондратьев олохтоохторго 2023-2024 сс. 60 миэстэлээх оскуола тутуута былааннанарын иһитиннэрдэ.
