Арассыыйа Аграрнай баартыйатын Саха сиринээҕи салаата быйылгы улахан бэлиитикэ тэрээһиннэригэр, Ил Түмэн быыбарыгар да ох курдук оҥостон, кимиилээхтик киирсэр чинчилээх. Сир-сир аайы мунньахтаан эрэллэрэ иһиллэр.
Ол курдук, соторутааҕыта өрөспүүбүлүкэ икки улахан улууһугар баар баартыйа тэрилтэлэригэр мунньах буолуталаабыт. Холобур, Уус Алдан улууһугар буолбут отчуоттуур-быыбардыыр мунньахха тэрилтэ салайар уорганнарын – бырабылыанньа уонна ревизком састаабын саҥардан биэрбиттэр. Туһааннаах улууска баартыйа тэрилтэтин салайааччытынан "Мүрү Ас" ССХПК бэрэссэдээтэлэ, улуустааҕы АККОР салайааччыта Степан Николаевич Бочкарев биир санаанан быыбардаммыт.
Таатта улууһугар уопсай баартыйа мунньаҕа тэриллибит. Бу сылларга олохтоох баартыйа тэрилтэтин үтүө суобастаахтык салайан, иилээн-саҕалаан кэлбит Гавриил Платонович Петров дуоһунаһыттан босхолонорун туһунан сайабылыанньа суруйан киллэрбит. Тоҕотун, төрүөтүн сырдаппыттара бу диэки иһиллибэт. Арай мунньах кыттыылаахтара сайабылыанньаны ылыммыттара этиллэр. Баартыйалаахтар ытыктабыллаах Гавриил Платонович таһаарыылаах үлэтин сыаналаан, махтал тылларын анаабыттар. Исполком салайааччыта Прокопий Старостин киниэхэ баартыйа Саха сиринээҕи салаатын Сэбиэтин Хайҕал кыраамататын, өйдөбүнньүк бэлэҕин туттарбыт.
Мантан салгыы Тааттатааҕы баартыйа тэрилтэтин саҥа салайааччытынан "Баай Ас" СХПК бэрэссэдээтэлэ Семен Николаевич Андросовы биир санаанан талбыттар. Саҥа талыллыбыт салайааччыларга ситиһиилээх үлэни баҕарбыттар.
Бу мунньахха баартыйа үлэтин-хамнаһын дьүүллэспиттэр, бүтүн өрөспүүбүүлүкэ сайдыытыгар дьоһун суолталаах быыбарга кытталларын туһунан кэпсэппиттэр. Баартыйаҕа киирбит саҥа чилиэннэргэ билиэттэри туттарыы дьоһуннаах түгэнэ буолбут. Мунньахха Аграрнай баартыйаҕа киириэхтэрин баҕалаахтар бааллара биллэн, сайабылыанньа суруйан сурулаппыттар.
Быһата, аграрнайдарбыт мантан инньэ баалларын биллэрэн, эдиинэйдэри кытта тэҥинэн сиэллэрэр чинчилэммиттэр. Сөп ээ, икки атахтаах аһыырын тухары астына сиир аспытын-үөлбүтүн бэлэмниир тутаах салаа кыһалҕатын иһиттэн билэр, тустаах дьарыкка үлэлэһэр дьоммут санаата иһиллиэхтээх- биллиэхтээх буоллаҕа.
