Арассыыйа Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев Приморье кыраайын 5 чунуобунньугун үлэлэриттэн үүрэргэ сорудахтаата. Онно кинилэр Австралия ынах этин оҥорон таһаарыынан дьарыктанар былааннаах инвесторыгар сир биэрэртэн батыммыттара сылтах буолбут. Бу туһунан ТАСС суруйар.
“Биһиги Приморьеҕа тыа хаһаайыстыбатын салаатыгар бырайыактаах Австралия хампаанньатын салайааччытын кытта көрсүбүппүт. Онтон салгыы бэрт дьикти быһыы-майгы буолбут: кини туох баар кадастр каартатын үөрэппит-чинчийбит, сөптөөх иллэҥ сири булбут, матасыыкылынан сылдьан көрбүт уонна сыл аҥаарын иһигэр субуруччу 5 аккааһы ылбыт. Мин маны интэриэһиргээн Приморье сүрүн федеральнай иниспиэктэрэ чунуобунньуктар тоҕо, туохха олоҕуран маннык быһаарыныыны ылбыттарын быһаарарыгар уонна үлэлэриттэн ууратарга сорудахтаабытым”, – диэн Трутнев муус устар 19 күнүгэр буолбут Кытай инвесторын күнүгэр эттэ.
Бу үлэ ый иһигэр оҥоһуллуохтаах этэ, уонна “судаарыстыба бас билиитин бэйэ бас билиитин кытта булкуйар дьонтон босхолонон иһиэххэ наада” диэн эбэн биэрдэ.
Сэҥээриилэр