СӨ Наукаҕа дьоҕус академиятын үөрэтэр-лабораторнай корпуһугар муус устар 27-29 күннэригэр ахсыс төгүлүн «Кэскиллээх интеллектуальнай лидердар» диэн форум ыытыллыаҕа. Бу форумҥа өрөспүүбүлүкэ араас улууһуттан наукаҕа уонна чинчийэр үлэҕэ бастыҥтан бастыҥ ситиһиилээх 100 оскуола үөрэнээччитэ мустуоҕа. Бу оҕолор бары, аһаҕас куонкурус түмүгүнэн, СӨ Наукаҕа дьоҕус академиятын дьиҥнээх чилиэннэрин уонна чилиэн-кэрэспэдьиэннэрин үрдүк аатын сүгэллэр.
«Быйыл аһаҕас куонкуруска өрөспүүбүлүкэ 29 улууһуттан 490 сайаапка киирбититтэн, анал сүүмэрдээһин түмүгүнэн, 200 бастыҥ көрдөрүүлээх оҕону таллыбыт. Сайаапкалары 1-11 кылаас оҕолоро ыыппыттара. Сүүмэрдээһин оҕолор наукаҕа ситиһиилэрин, араас эрэгийиэн, дойду уонна аан дойду таһымнаах куонкурустарга, кэмпириэнсийэлэргэ, олимпиадаларга кыттыыларын уочаттаан оҥоһулунна», - диэн академия ректора Василий Павлов кэпсээтэ.
«Кэскиллээх интеллектуальнай лидердар» форум быйыл ахсыс төгүлүн ыытыллар. Аан бастакы форум 2016 сыллаахха Өрөспүүбүлүкэ Бырабыытылыстыбатын уурааҕар олоҕуран тэриллибитэ. Билигин СӨ Наукаҕа дьоҕус академиятын дьиҥнээх чилиэнэ үрдүк ааты сүгэр саамай кыра саастаах оскуола оҕотунан Нерюнгри оройуонуттан төрүттээх 5 кылаас үөрэнээччитэ Владислава Корсун, оттон саамай алын саастаах чилиэн-кэрэспэдьиэнинэн Амма улууһуттан 4 кылаас үөрэнээччитэ Луиза Захарова буолаллар.
Дьокуускай куорат 25 №-дээх оскуолатын 11 кылааһын үөрэнээччитэ Илья Бецанич:
«СӨ Наукаҕа дьоҕус академиятын дьиҥнээх чилиэн буолуум миэхэ элбэҕи биэрдэ. Бастатан туран, мин Сахабыт сирин араас улуустарыгар олорор науканан, тиэхиньикэнэн ылсан туран үлүһүйэр бэйэм саастыылаахтарбын кытары билистим, доҕордостум. Иккиһинэн, араас дойду таһымнаах бөдөҥ научнай-чинчийэр куонкурустарга кыттан, кыайыыны ситистим. Холобура, Аан дойдутааҕы В.И. Вернадскай аатынан ыччат чинчийэр үлэлэрин куонкуруһугар лауреат үрдүк аатын сүктүм, «Инникигэ хардыы» билим-быраактыка кэмпириэнсийэтигэр аан дойду таһымнаах түһүмэҕэр кытынным. Инники олохпун билими кытта ыкса ситимниир уонна оскуолабын түмүктээтэхпинэ биолог эбэтэр гидробиолог идэтин баһылыыр инниттэн үрдүк үөрэх кыһатыгар туттарсар соруктаахпын», - диэн санаатын үллэстэр.
Оттон Хотулугуу-Илиҥҥи федеральнай университет үөрэтэр-чинчийэр анал киинин 10 кылааһын үөрэнээччитэ Семен Платонов:
«Алтыс кылааска үөрэнэ сылдьан наукаҕа бастакы хардыыбын оҥорбутум. Ол курдук балык хатырыгыттан уот энергиятын ылыыга чинчийии ыытан саҕалаабытым. Бу чинчийиибин сылтан сыл тупсаран, кэҥэтэн иһэбин. Бу үлэбинэн дойду таһымнаах икки бөдөҥ куонкурустарга бастакы миэстэни ылары ситиспитим», - диэн кэпсиир.
«Кэскиллээх интеллектуальнай лидердар» форумҥа мустубут оҕолору интэриэһинэй тэрээһиннэр күүтэллэр. Ол курдук, кинилэр өрөспүүбүлүкэ экэниэмикэҕэ миниистирин солбуйааччы Александр Афанасьевы, Саха сирин сайдыыга корпорациятын үлэһитэ Александр Христофоровы кытта атах тэпсэн олорон өрөспүүбүлүкэ инники сайдыытын торумнуохтара. Итини сэргэ ис кыахтарын, өйдөрүн-санааларын, уйулҕаларын сайыннарар трениннэри, дьарыктары ааһыахтара, сөпкө саҥарарга, инникини торумнуурга, идэни сөпкө тайанан талыыга туһуламмыт көрсүһүүлэргэ, дьарыктарга сылдьыахтара.
Николаев-киин пресс-сулууспата.
