Арктикатааҕы судаарыстыбаннай култуура уонна ускуустуба (АГИКИ) институтун уонна Хотугулуу-Илиҥҥи федеральнай университет бэрэстэбиитэллэрэ Камерун Бертуа университетыгар сырыттылар. Көрсүһүү түмүгүнэн, АГИКИ уонна Африка үрдүк үөрэҕин кыһата кэккэ хайысханан хардарыта үлэлэһиигэ сөбүлэҥ түһэристилэр.
«АГИКИ уонна ХИФУ Бертуа университетын кытта сөбүлэҥ түһэрсибит бастакы үөрэх кыһалара буолаллар, — диэн АГИКИ бастакы проректора Станислав Иванов бэлиэтээтэ. — Биһиги маннааҕы култуура, лингвистика уонна ускуустуба институтун кытта ыкса үлэлэһиэхпит. Институт үлэһиттэрэ киинэ, муода, дизайн уонна да атын хайысхаларга кыттыһан үөрэх тосхоллорун арыйар баҕалаахтар. Ону таһынан, университет үлэһиттэригэр бибилэтиэкэ дьыалатын уонна түмэл үөрэҕэр таһымы үрдэтэр куурустары ыытарга этии киллэрдилэр. Тоҕо диэтэххэ, ити хайысхаларынан эһиилги үөрэх дьылыттан бастакы устудьуоннары үөрэтэн саҕалыахтара», - диэн кини кэпсээтэ.
Иванов эппитинэн, университет салалтата үрдүкү оскуолаҕа үөрэтии мэтиэдьикэтигэр куурустары сэҥээрэр эбит. Ол туһугар институт үлэһиттэрэ Африка култууратын уонна ускуустубатын үөрэтэр куурустары ыытар санаалаахтар.
Маны сэргэ, Бертуа университетыгар АГИКИ уонна ХИФУ иилиир Нуучча тылын аһаҕас киинэ аһылынна. «Уһук сытар уонна үрдүк үөрэх кыһаларынан хабылла илик регион уонна провинция Саха сирин болҕомтотугар сылдьыаҕа», — диэтэ проректор.
Бу иннинэ айар эйгэлээх үөрэх кыһата Дуала университетын култуура уонна ускуустуба институтун кытта ювелирнай дизайыҥҥа икки дьупулуомнаах үөрэх тосхолун оҥорор туһунан сөбүлэҥ түһэрсибитэ. Үөрэх кыһатыгар маннык тосхол ирдэнэрин институт дириэктэрэ Аннет Нгуеа биллэрбитэ. Онон үөрэх кыһалара идэни уларытыы уонна таһымы үрдэтии тосхоллорун кыттыһан оҥоруохтара.
Сонун төрдө: Улус Медиа
