Ахсынньы 12 күнүгэр СӨ норуодунай дьокутаата Виктор Лебедев аатыттан РФ Төрүт сокуонун 30 сылыгар ананан ыытыллыбыт “Якутия, устремленная в будущее: природа, люди, прогресс” үөрэнээччилэр ортолоругар өйтөн суруйуу (эссе) күрэҕин кыайыылаахтарыгар Махтал суруктары уонна өйдөбүнньүк бэлэхтэри туттардылар.
Күрэҕи Пётр Гоголев бэрэссэдээтэллээх СӨ Төрүт сокуонун сэбиэтэ тэрийдэ. Кыайыылаахтары СӨ Ил Түмэнин дьиэтигэр наҕараадалаатылар.
СӨ норуодунай дьокутаатын, “Саханефтегазсбыт” АУо генеральнай дириэктэрин өйдөбүнньүк бэлэхтэрин Таатта улууһун А.Е. Мординов аатынан лиссиэйин 9-с кылааһын үөрэнээччитэ Михаил Марков уонна Томпо улууһун Тополинай орто оскуолатын 11-с кылааһын үөрэнээччитэ Артур Семёнов туттулар.
Михаил Марков уһуйааччыта, Таатта лиссиэйин устуоруйаҕа уонна обществознаниеҕа учуутала Сардаана Сыромятникова Таатта–Томпо быыбардыыр уокуруктарын норуодунай дьокутаата Виктор Лебедевкэ оҕону сайыннарарга туһуламмыт бырайыактары мэлдьи өйүүрүн иһин махтанна. Ураты махталын Виктор Николаевичка 2023 сыл сааһыгар СКЭ-ни туттарар Таатта уонна Томпо улуустарын үөрэнээччилэригэр ХИФУ математика, физика, нуучча тылын уонна обществознание бастыҥ преподавателлэрин босхо консултаассыйаларын тэрийбитин иһин тиэртэ.
Үөрүүлээх тэрээһиҥҥэ кытта Артур Семёнов ыраах Томпо оройуонун Тополинай сэлиэнньэтиттэн 700 килэмиэтири айаннаан кэллэ. 10–11-с кылаас үөрэнээччилэригэр ыытыллыбыт күрэх кыайыылааҕын ахсааныгар киирбититтэн олус үөрэрин эттэ уонна норуодунай дьокутаакка оскуоланы бүтэрээччигэ наадалаах тэрили – гаджеты – бэлэхтээбитин, улуус оскуолаларын бастыҥ үөрэнээччилэригэр сыл аайы бириэмийэ туттарарын иһин махтанна. Артур Семёнов салайааччыта – Томпо орто оскуолатын устуоруйаҕа учуутала Анастасия Саввина.
Күрэх кыайыылаах-тарын саастарынан бөлөхтөргө арааран быһаардылар: 7–9-с уонна 10–11-с кылаастарга. Бастакы бөлөххө 1-кы миэстэни Тааттаттан Михаил Марков ылла, 2-с миэстэҕэ Амматтан Евгения Давыдова таҕыста, 3-с миэстэҕэ Амматтан Евгения Шестакова тигистэ.
10–11-с кылаас үөрэнээччилэригэр 1 миэстэни Томпоттан – Артур Семёнов, 2-һи Хаҥаластан Алексей Зайцев уонна 3-һү Дьокуускайтан Кристина Саввина ыллылар.
Яна БАЙГОЖАЕВА.
