Быйыл “I Speak English” тыл оскуолата (салгыы – ISE) төрүттэниэҕиттэн 11 сылааста. Бу уһуна суох кэрчик кэм иһигэр дьоҕус стартаптан саҕалаан, улахан тыл оскуолатыгар тиийэ сайынна. Саха сирин олохтоохторун билиниилэрин, хас да тыһыынча үөрэнээччи тапталын ылла.
“ISE” төрүттээччи – Елена Попова. Кини Дьокуускайга омук тылларын үөрэтэр оскуолалар кэм тургутуутун ааспыттарын бэлиэтиир: “Саха сирин талааннаах дьонугар аан дойдуну кытта тэҥҥэ сайдар кыаҕы биэрэр баҕалаахпыт. Үөрэххэ, үлэҕэ-хамнаска ситиһиилэнэргэ, үүнэргэ-сайдарга, билиини хаҥатарга тыл сүрүн үстүрүмүөн буолар. Биһиги оскуолабыт 2012 с. тэриллибитэ. Ол кэмҥэ биир эрэ омук учууталлаах, уопсайа 50 үөрэнээччилээх этибит. Маҥнай аһылларбытыгар биир идиэйэнэн умайбыппыт өрө көтөҕүллүүбүтүгэр улахан суолталаах буолуон сөп”.
Сыл буолаат, “ISE” саҥа 313 кв.м. иэннээх дьиэҕэ көһөн кэҥээбитэ. Оскуола кэлэктиибэ омук тылын барбах билэр дьону үөрэтэргэ олохтоох преподавателлэри кытта үлэлэһэн барбыта.
2014 с. “ISE” оскуолатын иһинэн өрөспүүбүлүкэ олохтоохторо араас омук дойдуларыгар виза ылалларыгар виза киинин аспыттара. Бу киин көмөтүнэн Саха сирин 2,5 тыһ. олохтооҕо омук дойдуларыгар сынньана, үөрэнэ, олоро барар кыахтаммыта.
“ISE” ситиһиилээх үлэтин түмүгэр “IELTS” норуоттар икки ардыларынааҕы таһымнаах эксээмэн тутар киин официальнай бэрэстэбиитэлэ буолбута. Атын омук сирдэригэр хас да сүүһүнэн оҕолору ыытта, 11614 устудьуону омук тылыгар үөрэттэ. Оскуола сүрүн уратыта – омук учууталлар көмөлөрүнэн тыл эйгэтигэр киллэрэн үөрэтии. Омук учууталлар хайа да дойдуга омук тылын үөрэтэр анал сэртипикээттээхтэр.
– Быраактыка көрдөрбүтүнэн, биһиги үөрэтэр методикабыт тыл барьерын суох гынар, ол түмүгэр дьон тылы судургутук ылынар, өйдүүр буолаллар. Хас да тылы тэҥҥэ билии – аныгы кэм ирдэбилэ. Киһи өйүн, дьоҕурун көрдөрөр, баай култууратын атын дойдуларга билиһиннэрэр, сири-дойдуну көрөр кыахтанар, – диэн оскуоланы төрүттээччи кэпсиир. – Дьыалаларыгар бэриниилээх, талааннаах кэллиэгэлэрим, партнёрдарым уонна биһиги оскуолабытын – “ISE” – итэҕэйэр-эрэнэр дьон көмөлөрүнэн кииммит уон төгүл улаатта, бэйэбит хайысхабытыгар өрөспүүбүлүкэҕэ лиидэр буоллубут. Бу таһымҥа тута тахсыбатахпыт. Суолбутугар араас уустугу көрсүбүппүт, араас бырайыагы үлэлэтэн баран саппыппыт, ол эрээри бэйэ-бэйэбитин өйөһөн, сыалбыт-сорукпут туһугар иннибит диэки хардыылаан испиппит. Ол курдук, 11 сыл устата Саха сирин олохтоохторо аан дойду дьонун кытта биир тыллаах буолалларыгар, үүнэ-сайда туралларыгар көмөлөһөбүт, – диэн Елена Попова кэпсээнин түмүктээтэ.
Бэйэ кэр.
