РФ Үөрэҕириитин министиэристибэтэ уонна Үөрэх эйгэтин кэтиир федеральнай сулууспа БКЭ саҥа наардалын бигэргэттилэр. Ол быһыытынан оскуоланы бүтэрээччи биир эксээмэни туттарбыт сылыгар хаттаан туттарар бырааптанна.
Туһааннаах бирикээскэ информатика, обществознание, нуучча тылын, физика, химия эксээмэннэрин, ону сэргэ омук тылын суругунан чааһын хаттаан туттарыы от ыйын 4 күнүгэр ыытыллара чопчуланар.
Биологияны, географияны, математиканы (базовай уонна профильнай), устуоруйаны, литэрэтиирэни уонна омук тылын саҥаран туттарыллар чааһын — от ыйын 5 күнүгэр. Маны таһынан, бигэргэммит наардалга, оскуоланы бүтэрээччи түмүгү ылан хаттаан туттарарга быһаарынарын курдук, эксээмэннэри бирэдимиэттэринэн арааран болдьохторун быһаардылар.
Бастакы уонна булгуччулаах бирэдимиэттэргэ БКЭ болдьохторо уларыйбатаҕын тоһоҕолоотулар: ыам ыйын 23 күнүгэр —география, литэрэтиирэ уонна химия, ыам ыйын 28 күнүгэр — нуучча тыла, ыам ыйын 31 күнүгэр — базовай уонна профильнай таһымнаах математика. Бэс ыйын 4 күнүгэр — обществознание уонна физика, бэс ыйын 7 уонна 8 күннэригэр информатика эксээмэнин кытта омук тылын саҥаран туттарар чааһа биир кэмҥэ буолуохтара. Биология уонна омук тылын суругунан чааһа бэс ыйын 11 күнүгэр устуоруйаны кытта биир кэмҥэ буолуохтара.
Онуоха, географияҕа, информатикаҕа уонна обществознаниеҕа булгуччулаах судаарыстыбаннай эксээмэни (ОГЭ) бэс ыйын 10 күнүгэр көһөрдүлэр.
Сонун төрдө: yk24.ru
