Бүгүҥҥүттэн, ыам ыйын 23 күнүттэн, СКЭ сүрүн түһүмэҕэ саҕаланна. Бүгүн 124 эксээмэн ыытыллар сиригэр өрөспүүбүлүкэ выпускниктара хиимийэ, нуучча литэрэтиирэтин уонна география эксээмэннэрин туттараллар. Барыта 1483 выпускник бэлиэтэммит. Ол туһунан СӨ Үөрэххэ уонна билимҥэ миниистирэ Ньургууна Соколова иһитиннэрэр.
СКЭ сүрүн түһүмэҕэ ыытыллар кэмигэр эксээмэни туттарар 228 пуун арыллар былааннаах. СКЭ-ни туттарарга барыта 7607 киһи сайабылыанньаны биэрбит. Онтон 7075 киһитэ – быйылгы выпускник. 178 туттарааччыта – доруобуйатыгар хааччахтаах оҕо.
“Сүрүн сорукпут уларыйбат – эксээмэннэри сиэрдээхтик уонна дьэҥкэтик тэрийии. Хас биирдии эксээмэни тутар пууҥҥа РФ сокуоннарын чэрчилэринэн бигэргэммит быраабылалар тутуһуллуохтаахтар, табыгастаах усулуобуйа тэриллиэхтээх”, – диэн миниистир анаан бэлиэтээтэ.
Санаттахха, быйыл Саха сиригэр СКЭ-ни 7600-тэн тахса киһи туттара, оттон ОГЭ-ни – 14 000 үөрэнээччи.
