Анал байыаннай дьайыы кыттыылаахтарыгар уонна кинилэр оҕолоругар Арассыыйа үрдүк үөрэҕин кыһаларыгар туспа квоталар көрүллэн тураллар – уопсай миэстэттэн 10%. Ол туһунан бэс ыйын 24 күнүгэр СӨ үөрэххэ уонна билимҥэ миниистирэ Ньургууна Соколова иһитиннэрдэ.
Байыастар уонна кинилэр оҕолоро ити курдук анал квотанан быйыл иккис сылын үөрэххэ туттарсыахтара. Үөрэххэ тутуу хампаанньата бэс ыйын 24 күнүттэн от ыйын 25 күнүгэр диэри тэриллэр.
Орто анал үөрэх кыһаларыгар туспа квота көрүллүбэт эрээри, анал байыаннай дьайыы кыттыылаахтарын уонна кинилэр оҕолорун докумуоннарын “приоритеттаах” бэрээдэгинэн тутуохтара. Колледжтарга докумуоннары атырдьах ыйын 15 күнүгэр диэри ылыахтара.
Итини таһынан, Саха сиригэр АБДь кыттыылаахтарын оҕолоро сыйынын сынньалаҥ лааҕырдарыгар сылдьыахтарын сөп. Миниистир этэринэн, бэс ыйын 23 күнүгэр оҕолор бастакы бөлөхтөрө Краснодар кыраайыгар баар “Созвездие” лааҕырга сынньанан кэлбиттэр. Бастакы бөлөххө өрөспүүбүлүкэ алта улууһуттан 160 оҕо сылдьыбыт. Бу күннэргэ 154 оҕолоох иккис бөлөх сынньана көттө.
“Итини сэргэ, биһиги бэйэбит судаарыстыбаннай уонна миниципальнай лааҕырдарбытыгар оҕолор эмиэ сынньана сылдьаллар”, – диэн Ньургууна Соколова кэпсээтэ.
Көмө миэрэлэр тустарынан СӨ үөрэххэ уонна билимҥэ министиэристибэтин “итии лииньийэтигэр” эрийэн сиһилии билсиэххэ сөп: “122”, эбии “9” сыыппараны баттыыгыт.
