Үөһээ Дьааҥы Сайдыытыгар 1960 с. тутуллубут хаарбах оскуоланы көтүрэннэр, саҥа таас үөрэх кыһатын арыйдылар. Оскуола-саад барыта 120 миэстэлээх. Ол иһигэр 80 – оскуола, 40 – уһуйаан.
Саҥа оскуола тутуута 2022 с. Ил Дархан дьаһалынан саҕаламмыта. Онон тэрилтэ арыллыытыгар Айсен Николаев бэйэтэ сырытта. Ити туһунан СИА суруйар.
“2022 с. үлэбинэн Үөһээ Дьааҥы улууһугар тиийэн сылдьан Сайдыыга булгуччу уонна түргэнник оскуола тутуллуохтаах диэн быһаарбытым. Икки сыл иһигэр ол олоххо киирдэ. Бу оскуолаҕа улуустарын, Сахаларын сирин туһугар айар-тутар, төрөөбүт дойдуларын таптыыр үтүө дьон үүнэн тахсыахтара диэн эрэнэбин”, – диэн Ил Дархан эҕэрдэлээн туран, оскуолаҕа пилота суох көтөр аппарааты атыылаһар сэртипикээт бэлэхтээтэ.
Саҥа кыһа барыта 3200 кв миэтэрэ иэннээх. Оскуолата 80 миэстэлээх буоллаҕына, уһуйаана – 40. Оҕо үөрэнэригэр-сайдарыгар бары усулуобуйа тэриллибит – сырдык-ыраас кылаастар, уһуйаан иитиллээччилэрэ оонньуур-үөрэнэр хосторо, успуорт, технология кэбиниэттэрэ, о.д.а.
“Саҥа оскуола тутулларын олус өр күүппүппүт. Мантан антах оҕолорбут аныгы, бары идрэбилгэ эппиэттиир кыһаҕа үөрэниэхтэрэ. Бу биһиги бөһүөлэкпитигэр улахан бэлиэ түгэн буолар”, – диэн дириэктэр Александр Дьяконов үөрүүтүн үллэһиннэ.
Билигин оскуолаҕа 53 оҕо үөрэнэр, уһуйааҥҥа 15 оҕо сылдьар.
“Саҥа оскуолабыт олус кыраһыабай! Мин ордук успуорт саалатын уонна бибилэтиэкэни сөбүлээтим. Үөрэнэргэ наһаа интэриэһинэй буолуоҕа”, – диэн сөхпүт-махтайбыт, саҥа оскуолаламмытыттан олус астыммыт 5 кылаас үөрэнээччитэ Афоня Томскай этэр.
Даҕатан эттэххэ, 2018 сылтан бэттэх Саха сиригэр 171 үөрэх кыһата тутулунна. Ол иһигэр 75 оскуола уонна 81 уһуйаан. 2025 сылга 13 оскуола үлэҕэ киириэхтээх.
