АЛРОСА хампаанньа өрөспүүбүлүкэ кэнчээри ыччатын сайыннарарга анаммыт социальнай көҕүлээһиннэри көхтөөхтүк өйүүр. Оҕо, ыччат айар дьоҕурун сайыннарар сыаллаах-соруктаах үлэлиир Үүнэр көлүөнэ тус сыаллаах пуондатын кытта бииргэ тиһиктээхтик үлэлэһэр. Маннык көҕүлээһиннэр баар буоланнар сарсыҥҥы күммүт эрэллэрэ – оҕолорбут – талааннарын арыйаллар, баҕа санааларын толороллор.
АЛРОСА – СӨ Үүнэр көлүөнэ тус сыаллаах пуонда сүрүн партнера. Хампаанньа сыл аайы өрөспүүбүлүкэ социальнай хайысхалаах бырайыактарыгар улахан суумалаах үбү-харчыны аныыр. Үүнэр көлүөнэ пуондатын генеральнай дириэктэрэ Владимир Егоров бэлиэтииринэн, үп-харчы партнера буоларын таһынан дириҥ ис хоһоонноохтук хардарыта үлэлэһэллэр. Ол көмөтүнэн пуонда Саха сирин ыччатын олоҕун уонна иитэр-үөрэтэр усулуобуйатын тупсарар социальнай суолталаах элбэх бырайыагы олоххо киллэрэр кыахтанар.
– Ааспыт сылларга пуонда араас суолталаах 130-тан тахса социальнай эбийиэги: мэдиссиинэ, үөрэх тэрилтэлэрин, уһуйааннары, култуура кииннэрин уонна успуорт былаһааккаларын туттарбыта уонна саҥардан оҥорторбута. Аныгы технологиянан уонна тэрилинэн хааччыллыбыт айар идэҕэ үөрэтэр кылаастардаах анал үөрэх тэрилтэлэрэ үлэҕэ киирбиттэрэ. Бу үлэ үксэ АЛРОСА көмөтүнэн ситиһиллибитэ. Хампаанньа өйөбүлүнэн өрөспүүбүлүкэ ыччатын доруобуйатын тупсарарга, хаачыстыбалаах үөрэҕи, иитиини ыларыгар саҥа үстүрүмүөннэри хааччыммыта.
АЛРОСА өрөспүүбүлүкэ киин куоратыгар уонна кэккэ оройуонугар үөрэх, култуура, успуорт эбийиэктэрэ тутуллалларыгар үбү-харчыны көрбүтэ. Холобур, Амма улууһун Бөтүҥ сэлиэнньэтигэр адаптивнай успуорт көрүҥнэригэр элбэх соруктаах успуорт саала, Абый оройуонун Абый сэлиэнньэтин оскуолата, Дьокуускайга Өрөспүүбүлүкэтээҕи доруобуйаларынан хааччахтаах оҕолору уонна ыччаты чөлүгэр түһэрэр киин уо.д.а. тутуллалларыгар улахан көмөлөөх. Ону таһынан алмаас хампаанньата сыл аайы Саха сиригэр ыытыллар араас хабааннаах тэрээһиннэргэ үбүнэн-харчынан мэлдьи көмөлөһөр, – диэн Владимир Егоров кэпсээтэ.
Пуонда АЛРОСА-ны кытта бииргэ кыһамньылаахтык үлэлэһэн оҕолор бэйэлэрин арыйалларыгар айар-тутар эйгэни үөскэтэр. Бииргэ үлэлэһии чэрчитинэн “Кэскил туһугар” киэҥ хабааннаах бырагыраама үлэлиир. Бырагыраама, эмиэ атын бырайыактар курдук, оҕо уонна ыччат дьоҕурун, кыаҕын сайыннарарга туһуланар.
– Биһиги ураты болҕомтобутун оҕолор талааннарын арыйарга уонна айар дьоҕурдарын чочуйарга анаммыт бырайыактарга уурабыт. Талааннаах оҕолору көрдүүр инниттэн оройуоннарга араас тэрээһин ыытабыт, десаннары тэрийэбит. Холобур, оҕо ханнык успуорт көрүҥэр ордук дьоҕурдааҕын билээри анал тэрили туһанабыт. Төрөппүккэ эмиэ табыгастаах: оҕото успуорт ханнык көрүҥэр ситиһиилэниэн сөбүг билэр. Былырыын оҕолору креативнай индустрия хайысхатынан сайыннарар инниттэн хотугу улуустарга айаннаабыттара. Тэрээһин “Креативнай индустрия дьоҕус академията” АГИИК бырайыагын чэрчитинэн барбыта. Бырайыак Үүнэр көлүөнэ пааркатын кытта тэриллэр, – диэн Владимир Егоров салгыы кэпсиир.
Пуонда алмаас хампаанньатын кытта бииргэ үлэлэһэрэ социальнай үрдүк эппиэтинэс уонна өрөспүүбүлүкэ кэнэҕэс сайдыытыгар кылааты киллэрии суолталааҕын өйдөтөргө бастыҥ холобур буолар. Маннык кыттыгас үлэ уопсай үүнүү-сайдыы туһугар судаарыстыба, урбаан уонна гражданскай уопсастыба ыкса сибээстээх үлэлииллэрин көрдөрөр.
Киинэ сайдыытыгар
Пуонда киэҥ эйгэҕэ биллэр бырайыактарыттан биирдэстэрэ – “КиноМАНиЯ” киинэ бэстибээлэ. Бэстибээли “СӨ Үүнэр көлүөнэ тус сыаллаах пуондата” АНО уонна СӨ Билимин дьоҕус академията тэрийэллэр. Ол курдук, быйыл АЛРОСА хампаанньа өйөбүлүнэн ыытыллар өрөспүүбүлүкэ бэстибээлэ Уһук Илин бэстибээлигэр тиийэ улаатыаҕа. Киэҥ сири хабар бэстибээл “14 кадр” кылгас метражтаах киинэлэргэ ананыаҕа, 8–11-с кылаас үөрэнээччилэригэр киинэ умсугутуулаах эйгэтигэр ааны арыйыаҕа. Бу салааҕа билиини ылбыт уонна профессиональнай тиэхиньикэлээх 7 хамаанда 7 күн устата кылгас метражтаах киинэлэри устуунан дьарыгырыаҕа. Киинэ күрэһигэр саамай талааннаах, айар дьоҕурдаах, сатабыллаах хамаанда кыайыы өрөгөйүн билиэҕэ.
– АЛРОСА өйөбүлүнэн кылгас кэм иһинэр “КиноМАНиЯ” бэстибээли дьоҥҥо-сэргэҕэ биллэр бырайыак оҥорон таһаардыбыт. Быйыл бэстибээлбит сайдыы саҥа таһымыгар таҕыста – “14 кадр” кылгас метражтаах киинэ бэстибээлигэр кубулуйда, Уһук Илин эрэгийиэнин хабыаҕа. Бу айар үлэни уонна үөрэҕи тэҥҥэ дьүөрэлиир эдэр талааннар былаһааккалара буолуоҕа. Кыттааччылар киинэ устуутун түмүһэхтэрин барытын ааһыахтара: идиэйэттэн саҕалаан премьераҕа тиийэ. Бэйэлэрин биир эбэтэр хас да оруолга холонуохтара.
Биһиги бэстибээлбит сайын, чопчулаан эттэххэ, бэс ыйын 10–19 күннэригэр ыытыллыаҕа. Бастакы күннэригэр үөрэх чааһын тэрийиэхпит. Ол кэннэ үөрэнэээччилэр устар хамаандаларга арахсыахтара уонна бэйэлэрин көрүүлэринэн киинэни устубутунан барыахтара.
Бэстибээл түмүктүүр чааһа “Лена” киинэ тыйаатыр таһыгар буолуоҕа. Кыһыл көбүөр – бэстибээл булгуччулаах чааһа, – диэтэ Владимир Егоров.
Оскуола үөрэнээччилэригэр киинэ индустриятын киэҥ эйгэтин биллэрэр-көрдөрөр, айар дьоҕурдарын чочуйар уонна ускуустубаны өйдүүр, ылынар буолалларыгар хайысхаланар. Бэстибээл оҕолор бэйэлэрин кыахтарын холоноллоругар, култуурунай олоххо көхтөөхтүк кытталларыгар усулуобуйа тэрийэр уонна инникитин ханнык идэни талалларыгар көмөлөһөр. Бырайыак туох түмүктээҕин чахчылар дьэҥкэтик көрдөрөллөр. Ол курдук, “КиноМАНиЯ” киинэ бэстибээлин выпускниктара киинэ индустрията салааҕа үрдүк үөрэх кыһаларыгар үөрэнэ киирбиттэрэ. Олортон сорохторун интервью ылан хаста да сырдатан турабыт. Быйылгы бэстибээл хайдах тэриллэрин, туох уратылаах буоларын аны биир ыйынан кэпсиэхпит.
“Сайын!” оҕо уонна ыччат бэстибээлэ
Оҕо саас – үөрүү-көтүү, чаҕылхай өйдөбүл, бастакы арыйыылар уонна саҕалааһыннар кэрэ кэмнэрэ. Хас биирдии оҕо таптал, төрөппүт кыһамньытын сылаас эйгэтигэр улаатара суолталаах. Оҕо саас сүрүн бырааһынньыга – норуоттар икки ардыларынааҕы Оҕо көмүскэлин күнэ. Бу көрдөөх-нардаах күрэхтэрдээх үөрүү-көтүү бырааһынньыга эрэ буолбатах – уопсастыбаҕа оҕо быраабын көмүскүүрү санатыы буолар. Ону таһынан оҕо уонна ыччат талааннарын сайыннаралларыгар, сөбүлүүр дьарыктарынан дьарыктаналларыгар кыаҕы биэрии уонна дьоллоох буола улааталларыгар кыһамньыны ууруу буолар. Маннык сыаллаах-соруктаах Үүнэр көлүөнэ пуондата уонна АЛРОСА хампаанньа өйөбүлүнэн тэриллибит Саха сирин талааннаах оҕолорун көрдүүр, өйүүр эрэгийиэннээҕи киин “САЙЫН!” бэстибээли тэрийэллэр.
“Оҕо көмүскэлин күнэ – саамай үтүө, көрдөөх сайыҥҥы бырааһынньык. Үөрэнээччилэр сайыҥҥы уһун сынньалаҥнарыгар бараллар. Бу күн үгэс курдук араас хабааннаах элбэх тэрээһин ыытыллар. “САЙЫН!” бэстибээлгэ төрөппүттэр оҕолорун, эбэлэр, эһэлэр сиэннэрин илдьэ кэлэллэригэр ыҥырабыт. Бэстибээл бэс ыйын 1 күнүгэр Дьокуускай биир улахан былаһааккатыгар – Туймаада стадиоҥҥа – буолар.
Хас биирдии оҕо син биир туохха эрэ талааннаах, ону таба көрөн сайыннарарга көмөлөһүөхтээхпит. Оҕо талаана алмаас курдук чочуллан араас өҥүнэн күлүмүрдүү оонньуохтаах. Биһиги пуондабыт АЛРОСА хампаанньаны кытта маннык сыалы-соругу туруоран үлэлиир-хамсыыр. Бэстибээлгэ хас биирдии оҕо араас хайысхаҕа: билимҥэ, ускуустубаҕа, успуорка уонна креативнай индустрияҕа бэйэтин холонуоҕа. Кыттааччыларга араас маастар-кылаас, күрэх, оонньуу, квест тэриллиэҕэ. Итиэннэ, биллэн турар, үөрүү-көтүү үксүөҕэ, “Туймаада” стадионугар оҕо саҥата, көрө-нара толору буолуоҕа, – диэн түмүктээтэ Владимир Егоров.
Андрей ШИЛОВ.
