Судаарыстыба кэлим эксээмэнин 100 баалга туттарбыт үөрэнээччилэр учууталлара 100 тыһ. солк. Дьокуускай мээрин бириэмийэтин ылыахтара.
Ол курдук, Саха сирин 5 үөрэнээччитэ: СӨ лиссиэй-интэринээтиттэн Эркин Ноговицын, Нерюнгри 2 №-дээх гимназиятыттан Анна Когут, В.П. Ларионов аатынан физико-тэхиньиичэскэй лиссиэйтэн Кирилл Степанов химияҕа, оттон Маҕан орто оскуолатыттан Арина Леонова уонна куорат 39 №-дээх оскуолатыттан Айталина Чупрова литератураҕа судаарыстыба кэлим эксээмэнин (СКЭ) 100 баалга туттарбыттарын туһунан үөрүүлээх сонун кэллэ.
Быйыл өрөспүүбүлүкэ үрдүнэн 8505 оскуоланы бүтэрээччи СКЭ туттарар, Олортон 874 - химияны, 693 – литератураны талбыттар.
Дьокуускай куорат мээрэ Евгений Григорьев ааспыт сылтан СКЭ-ни 100 баалга туттарбыт үөрэнээччини бэлэмнээбит учууталга 100 тыһ. солк. бириэмийэ биэрэр.
Мария Степановна Дьячковская
Быйыл ити учууталлар бириэмийэлэрин үөрүүлээх быһыыга-майгыга Маҕан орто оскуолатыттан Мария Степановна Дьячковская, куорат 39 №-дээх оскуолатыттан Марианна Дмитриевна Ефимова уонна В.П. Ларионов аатынан физико-тэхиньиичэскэй лицейтэн Екатерина Дмитриевна Широких ылыахтара.
