Сылын аайы Чурапчытааҕы ФКиС института “Успуорт олох нуормата” диэн федеральнай бырагыраама чэрчитинэн, Арассыыйа уобаластарыгар, өрөспүүбүлүкэлэригэр успуорт национальнай көрүҥнэригэр куурус ыытар.
Ол курдук, бу күннэргэ сайыммыт сатыылаан турар кэмигэр, Оренбург уобалаһыгар, Татарстаҥҥа Федеральнай сабантуйга “Аттан суулларсыы күрэҕэ” диэн үөрэх быраактыкалаах чааһын ыытан кэллилэр.
Ол туһунан институт эбии үөрэхтээһиҥҥэ исписэлииһэ Анастасия Лукина кэпсээтэ:
“Дэлэгээссийэ састаабыгар институт исписэлиистэрэ: мин, Анна Иванова, акка олорон охтон ытыы тириэньэрэ Петр Неустроев уонна институт Саха сиригэр аттан суулларсыы успуордун саҕалааччылар диэн үбүлээн ыыппыт, уруккута биллэр-көстөр успуорт дьоно Герман Янков уонна Петр Марков буолан бара сырыттыбыт. Уолаттар көрөн-истэн, үөрэнэн, күрэхтэһэн кэллилэр.
Бастакы күн Оренбург уобалаһыгар Сабантуйга Герман Янков көрдөрүүлээх тэрээһиҥҥэ кыттыбыт. Иккис күн Татарстан Карабаш диэн куораттыҥы тииптээх бөһүөлэк Сабантуйугар кини аттан суулларсыы күрэҕэр кыттан, иккис миэстэ буолла.
Сарсыныгар уолаттар Башкортостаҥҥа Уфаттан чугас “Терра” диэн этнокомплекска атынан сүүрдэн иһэн оҕунан ытыы үөрэҕэр дьарыктаммыттар. Лиэктэрдэр бу көрүҥ сүрүн ирдэбиллэрин, судьуйулааһыны билиһиннэрдилэр”, – диэтэ.
Ити курдук Чурапчытааҕы ФКиС институтун үтүөтүнэн, Саха сиригэр аттан суулларсыы успуорда, атынан сүүрдэн иһэн оҕунан ытыы курдук саҥа интэриэһинэй успуорт көрүҥнэрэ киирэр кыахтаммыттар. Уолаттарбыт бастакы сырыыларыгар ситиһиилээхтик кыттыбыттара бу көрүҥнэр биһиэхэ күүскэ сайдар кыахтаахтарын көрдөрөр.
Владимир Степанов.
