Бүгүн, алтынньы 4 күнүгэр, Забайкалье киин куоратыгар боксаҕа Арассыыйа чөмпүйэнээтин 5-с күнэ буола турар. Өрөспүүбүлүкэ хомуур хамаандатыгар рингэҕэ үс араас ыйааһыҥҥа 5 спорстмен кыттыаҕа. Бу туһунан Спортивнай бэлэмнэнии хомуур хамаандаларын Өрөспүүбүлүкэтээҕи киинигэр иһитиннэрдилэр.
48 киилэҕэ диэри ыйааһыннаахтарга Саха сириттэн үс киһи кыттыаҕа. Краснодар уонна Саха сирин аатыттан кыттар Михаил Прокопьев Арассыыйа призерун, Татарстан спорстменын кытта киирсиэҕэ. Оттон Рустам Туприн Санк-Петербургтан Никифор Стодумовтыын күөн көрсүһүөҕэ. Саха сирин биир бастыҥ боксера Валерий-Талбан Егоров Рязан уобалаһыттан сылдьар Сергей Шитовтыын киирсиэҕэ.
60 киилэҕэ диэри ыйааһыннаахтарга чөмпүйэнээт иккис күөн көрсүһүүтүгэр Виталий Стручков Москубаттан сылдьар Аршак Товмасянныын рингаҕа киириэҕэ. Оттон 92 киилэҕэ диэри ыарахан ыйааһыннаахтарга Уһук Илин чөмпүйүөнэ Илья Попов Никита Рустенконы утары тахсыаҕа. Бары киирсээччилэр күнүс 14.00 чаастан саҕаланар сиэссийэҕэ кыттыахтара.
