Кулун тутар 1 күнүгэр II Норуоттар икки ардыларынааҕы «Азия оҕолоро» кыһыҥҥы успуорт оонньууларыгар Саха сирин сүүмэрдэммит хамаандатыгар икки үрүҥ көмүс уонна биир боруонса мэдээллэр кэллилэр.
Ол эбэтэр, Кемерово «Снежный» стадионугар кыргыттарга уонна уолаттарга хайыһар классикалыы истиилинэн спринтерскэй күрэхтэһиилэр түмүктэннилэр.
Маҥнай хамаанда хапытаана, Алданнааҕы Олимпийскай эрэллэри бэлэмниир өрөспүүбүлүкэтээҕи успуорт оскуолатын иитиллээччитэ Инна Рыбкина иккис миэстэни ылбыта. Финиш кэннэ Инна ситиһиитин тириэньэригэр аныырын биллэрдэ.
Уолаттар ортолоругар Вадим Ширяев уонна Вадим Кривоногов иккис, үһүс буоллулар. Оттон сноуборд көрүҥэр бастакы боруонса мэдээли Илья Соколов аҕалла.
Оонньуулар олунньу 23 күнүттэн кулун тутар 5 күнүгэр диэри ыытыллаллар.
Хаартыска: Дьулустаан Сергеев, ЯСИА
Сонун төрдө: CӨ Бырабыыталыстыбатын уонна Ил Дарханын пресс-сулууспата
