Улахан кылаас оҕолоругар төрүт многоборье көрүҥнэригэр «Үрүҥ уолан» күрэс кулун тутар 18 күнүгэр Нам улууһун Түбэ нэһилиэгэр ыытыллыаҕа. Турнир уон ахсыс төгүлүн буолар уонна күрэһи төрүттээччи, СӨ үөрэҕириитин туйгуна Петр Попов сырдык кэриэһигэр ананар.
Уолаттар биэс көрүҥҥэ киирсиэхтэрэ — тутум эргиир, мас тардыһыы, хапсаҕай, кууллаах сүүрүү уонна үс куобах. Хас биирдии көрүҥҥэ кыайыылаахтар тахсыахтара, кинилэр бары сыаналаах бириис тутуохтара. Оттон муҥутуур кыайыылаах - 50 000 солк., иккис миэстэлээх — 30 000 солк., үһүс миэстэлээх 20 000 солк. уу харчынан наҕараадаланыахтара.
«Бу тэрээһини биһиги аҕабыт уон биэс сыл устата тэрийбитэ. Кини оҕолору иитиигэ-такайыыга, успуорка уһуйууга элбэх сыратын уурбута. Билигин күрэһи биһиги салгыыбыт. Бу сыллар тухары «Үрүҥ уолан» оскуола саастаах уолаттарга «Дыгын оонньууларыгар», араас өрөспүүбүлүкэтээҕи уонна арассыыйатааҕы күрэстэргэ кытталларыгар трамплин буолбута. Оскуолаҕа үөрэнэ сылдьан «Үрүҥ уолаҥҥа» биллэр многоборецтар Артем Варданян, Антон Тойтонов, Роман Заровняев, Василий Дедов, Вячеслав Дьяконов уо.д.а. кыайан, миэстэлэһэн тураллар», — диэн тэрийээччи, Петр Попов улахан уола Николай Попов кэпсиир.
«Үрүҥ уолан» өрөспүүбүлүкэтээҕи турнир Нам улууһун дьаһалтатын, Успуорт министиэристибэтин, Баһылай Манчаары аатынан успуорт национальнай көрүҥнэрин «Модун» киинин уонна успуонсардар өйөбүллэринэн ыытыллар.
Турнирга кыттарга сайаапканы кулун тутар 16 күнүгэр диэри туталлар. Билсэр төл.: +7 (965) 996-38-81
Надежда Самсонова. Нам улууһа.
