Муус устар 13-17 күннэригэр Дьокуускайга «Триумф» успуорт уораҕайыгар Арассыыйа юниордарын көҥүл тустууга күрэхтэһиилэрэ ыытыллыахтара. Тэрээһин үөрүүлээх аһыллыыта кэлэр субуотаҕа киэһэ 18.00 чааска буолуоҕа.
Тэрийээччилэр иһитиннэрбиттэринэн, көрөөччүлэр үөрүүлээх аһыллыыга уонна күрэхтэһиилэргэ босхо киириэхтэрэ. Манна дойду 40 регионуттан 400 кэриҥэ 21-гэр диэри саастаах эдэр спортсмен кыттыаҕа. Саха сирин сборнайын аатын 36 бастыҥ бөҕөс көмүскүөҕэ.
“Бу күрэхтэһии көҥүл тустууну биһиирээччилэргэ үтүөкэн бэлэх буолуоҕа. Ол курдук, баҕалаах барыта сырыттын диэн, тэрээһиннэргэ киириини босхо гынныбыт. Онон, эдэр бөҕөстөр тыҥааһыннаах киирсиилэрин астына-дуоһуйа көрүҥ», - диэн СӨ физическэй култуураҕа уонна успуорка миниистирэ Леонид Спиридонов бар дьону ыҥырда.
Сонун төрдө: CӨ Бырабыыталыстыбатын уонна Ил Дарханын пресс-сулууспата
