"Самородок"адаптивнай физкультура уонна успуорт киинигэр көһөрүллүбүт уорганнаах уонна диализ ньыматынан эмтэнэр пациеннар ортолоругар IV Спартакиада буолан ааста. Манна барыта араас улуустан 40 спортсмен кыттыыны ылла.
Спартакиаданы сүрүн тэрийээччи, биллэр уопсастыбанньык Гаврил Чемоханов, норуот дьокутаата, дьиэ-кэргэн уонна оҕо аймах дьыалатыгар хамыһыйа салайааччыта Алена Атласова, "Самородок" киин дириэктэрэ Ньургун Иванов, күрэхтэһии кылаабынай судьуйата Василий Аргунов арыйдылар.
Гаврил Чемоханов этэринэн, бу күрэҕи пациеннар тус көхтөрүнэн уонна сүрэхтэрин баҕатынан, доҕотторун уонна успуонсардар көмөлөрүнэн тэрийдилэр.
Тэрээһини Надежда Павлова салайар этнофитнес бөлөҕө сэргэх флешмобунан олус киэргэттэ. Манна спартакиадаҕа кыттар уонна кинилэргэ ыалдьа кэлбит кэрэ куолар тэбис тэҥҥэ кыттыһан үҥкүлээн, хамсанан тэйдилэр. Бу чэбдигирдии сэргэх көрүҥэ фитнес, хореография уонна саха төрүт үҥкүүтүн хамсаныытын дьүөрэлиир. Инникитин пациеннар "Самородок" киинигэр бу көрүҥү арыйарга этии киллэрдилэр.
Харбааһыҥҥа, остуол тенниһигэр, хабылыкка, хаамыскаҕа, дартска күрэхтэһиилэр буоллулар. Успуорт дьоро түһүлгэтэ үрдүк таһымнаахтык барда. Сылга биирдэ буолар түмсүүлэриттэн кыттааччылар үөрэн-көтөн тарҕастылар. Кыайыылаахтар уонна миэстэлэспиттэр кубоктары туттулар, мэтээл кэттилэр уонна успуонсардар көмөлөрүнэн бириискэ тиксэн илии тутуурдаах, өттүк харалаах бардылар. Бастыҥнар сайын Москваҕа буолар трансплантацияламмыт уонна диализка сылдьар спортсменнар Бүтүн Арассыыйатааҕы оонньууларыгар Саха сирин чиэһин көмүскүөхтэрэ.
Бу тэрээһини Бүтүн Арассыыйатааҕы "НЕФРО-ЛИГА» тэрилтэ ыытыаҕа. Манна спортсменнары кытта волонтердар эмиэ барыахтара.
Хаартыска: Гаврил Чемоханов
Елена Николаева.
