Өрөспүүбүлүкэ биир саамай уопуттаах спортсмена, “Саханефтегазсбыт” аахсыйалаах уопсастыба эдэр үлэһитэ Николай Матаннанов “Дыгын оонньуулара-2023” күрэскэ кыттарга путевка ылла.
“Манчаары оонньууларын” икки төгүллээх абсолютнай кыайыылааҕа, “Дыгын оонньууларын” үс төгүллээх үрүҥ көмүс призёра, Саха Өрөспүүбүлүкэтигэр национальнай многоборьеҕа успуорт маастара Николай Матаннанов сүүмэрдиир түһүмэххэ 23 күөн көрсөөччүнү кытта киирсэн чаҕылхай түмүгү көрдөрдө уонна сайын өрөспүүбүлүкэ саамай күүстээх спортсменнарыныын илин-кэлин түһүсэр, күүһүн-уоҕун холоһор кыахтанна.
Николай Матаннанов кэпсээбитинэн, кини саха култуурата уонна литэрэтиирэтэ биһиктэммит сириттэн, талыы талба Тааттаттан, төрүттээх. Саха сиригэр биллэр-көстөр, аата ааттанар спортсмен, 2 уонна 7 саастаах кыргыттар аҕалара “Саханефтегазсбыт” АУо атыы-эргиэн управлениетыгар ньиэп бородуукталарын батарыыга сүрүн исписэлииһинэн төрдүс сылын үлэлиир. Үлэтин кытта күүстээх дьарыгы дьүөрэлиир: сыл уон ыйыгар тохтоло суох нэдиэлэҕэ алтата дьарыктанар. Арай от ыйыгар уонна атырдьах ыйыгар күүстээх дьарыктан сынньанан ылар. “Дыгын оонньууларыгар” 2016 сылтан кыттар, быйыл 7-с төгүлүн күөн көрсөргө былааннанар. “Эйиэхэ күрэстэһии саамай уустук көрүҥэ ханныгый?” диэн ыйытыыга Николай: “Хас биирдии түһүмэх суолталаах, кэрэхсэбиллээх, элбэх күүһү-күдэҕи, дьарыгы эрэйэр”, – диэн хоруйдуур.
Үгүс ситиһиилээх спортсмен, ХИФУ үп-харчы, экэниэмиэкэ институтун уонна РФ Бэрэсидьиэнин иһинэн РАНХИГС управлениетын Уһук Илиннээҕи институтун выпускнига Николай Матаннанов бэлиэтээбитинэн, дьиэ кэргэнин, аймахтарын сэргэ киниэхэ үлэлиир тэрилтэтэ – Виктор Николаевич Лебедев салайааччылаах “Саханефтегазсбыт” АУо салалтата, кэллэктиибэ – уонна Таатта улууһа улахан өйөбүл буолаллар.
Николай аҕата Петр Матаннанов – өрөспүүбүлүкэҕэ, Тааттаҕа эмиэ биллэр киһи. Кини успуорду уонна чөл олоҕу бэриниилээх тутуһааччы, мас тардыһыытыгар успуорт маастара. 1997 сыллаахха “Дыгын оонньууларыгар” 2-с миэстэни ылбыта, онтон 1999 сыллаахха “Манчаары оонньууларыгар” призёрдаабыта. “Аҕам туйаҕын хатарааччы буолабын” диэн киэн тутта кэпсиир. Николай “Дыгын оонньууларын” сэттэ төгүллээх чөмпүйүөнэ, номоххо киирбит Уйбаан Белолюбскайга “Боотур” успуорт кулуубугар дьарыктанар. “Төрүт култуурабытын, үгэспитин харыстыырга тирэх буолар, дьиэ кэргэн көмүскэлэ, дурдата-хаххата эр киһи, ол эбэтэр боотур, оруолун үрдэтэр сыаллаах тэриллэр “Дыгын оонньуулара” сахаларга ураты суолталаах”, – диэн санаатын үллэстэр.
Кини ситиһиилэрбинэн ыччаты күүстээх-уохтаах, сымса буолары таһынан туруоруммут сыалы-соругу ситиһэргэ, бигэ санаалаах, киэҥ көҕүстээх боотур буоларга көҕүлүөм диэн эрэл санаалаах. Маны таһынан 2025 сылга Ытык Күөл сэлиэнньэтигэр ыытыллыахтаах “Манчаары оонньууларыгар” төрөөбүт-үөскээбит Тааттатын чиэһин ситиһиилээхтик көмүскүүр былааннаах.
“Саханефтегазсбыт” АУо пресс-сулууспата.
Ыспыраапка:
Эдэр бөҕөс Николай Матаннанов ситиһиилэрэ:
– “Дыгын оонньууларын” сэттэ төгүллээх кыайыылааҕа Уйбаан Белолюбскай бирииһигэр ыытыллыбыт “Чөмпүйүөн куубага-2017” өрөспүүбүлүкэ турнирыгар национальнай многоборьеҕа үрүҥ көмүс призёр;
– “Манчаары оонньуулара-2017” успуорт национальнай көрүҥнэрин ХХ үбүлүөйдээх спартакиадатыгар эр дьоҥҥо национальнай многоборьеҕа абсолютнай чөмпүйүөн;
– 2018 с. “Дыгын оонньууларыгар” национальнай многоборьеҕа үрүҥ көмүс призёр;
– 2015 с. “Бодибилдиҥҥа уонна фитнес-бикинигэ СӨ-тигэр Гран-при” күрэххэ 75 киилэҕэ диэри ыйааһыннаахтарга чөмпүйүөн;
– 2021 с. “Дыгын оонньууларыгар” национальнай многоборьеҕа үрүҥ көмүс призёр;
– “Манчаары оонньуулара-2021” успуорт национальнай көрүҥнэрин ХХI спартакиадатыгар эр дьоҥҥо абсолютнай чөмпүйүөн;
– “Дыгын оонньууларын” сэттэ төгүллээх кыайыылааҕа Уйбаан Белолюбскай бирииһигэр ыытыллыбыт “Чөмпүйүөн куубага-2022” өрөспүүбүлүкэ турнирыгар национальнай многоборьеҕа үрүҥ көмүс призёр;
– 2022 с. “Дыгын оонньууларын” үрүҥ көмүс призёра.
