Киир

Киир

Саха АССР, РСФСР уонна ССРС үтүөлээх тириэньэрэ Дмитрий Петрович Коркин 1928 сыл балаҕан ыйын 5 күнүгэр Чурапчы Кытаанаҕар төрөөбүтэ. Онон, улуу тириэньэрбит өрөгөйдөөх үбүлүөйэ бу тиийэн кэллэ.

От ыйын 31 күнүгэр Дмитрий Коркин үбүлүөйүн чэрчитинэн ыытыллар мероприятиеларга тэрийэр кэмитиэт мунньахтаабыта. Мунньаҕы СӨ Бырабыыталыстыбатын бэрэссэдээтэлэ Андрей Тарасенко иилээн-саҕалаан ыыппыта. Ити тэрээһиннэри ыытарга Саха Өрөспүүбүлүкэтин баһылыга Айсен Николаев анал уурааҕа тахсан турар.

Дмитрий Коркин кэриэһигэр “Гран-при” категориялаах XV аан дойдутааҕы турнир номнуо балаҕан ыйыгар ыытыллыаҕа. Ити күрэхтэһии чэрчитинэн “Дмитрий Петрович Коркин нэһилиэстибэтэ уонна көҥүл тустуу аан дойдуга сайдар саҕахтара” диэн ааттаах билим-быраактыка кэмпириэнсийэтэ ыытыллыахтаах. Дмитрий Петрович олоҕун-дьаһаҕын, үлэтин-хамнаһын, айар үлэтин туһунан уус-уран киинэ уһулла сылдьар. Уонна Дьокуускайга педагог-тириэньэрдэргэ аналлаах өрөспүүбүлүкэтээҕи куонкурус ыытыллыахтаах. Ити тэрээһин “Саҥа методикалары уонна дьарыкка туттуллар тэриллэри айан таһаарыы уонна олоххо киллэрии” диэн ааттаах.

Чурапчыга, улуу тириэньэрбит төрөөбүт сиригэр-уотугар көҥүл тустуу улахан түһүлгэтэ (матчевая встреча) ыытыллара былааннанар. Ити күрэхтэһиигэ өрөспүүбүлүкэбит бастыҥ бөҕөстөрө эрэ буолбакка – аан дойду бастыҥтан бастыҥ тустууктара кыттыахтаахтар. Ити тэрээһин чэрчитинэн Монреаль Олимпиадатын кыайыылааҕа, аан дойду үс төгүллээх чөмпүйүөнэ Павел Пинигин “Мин учууталым Дмитрий Коркин: өрөгөйгө тиэрдэр суол” диэн кинигэтэ сүрэхтэниэхтээх.

Уонна улуу тириэньэр үбүлүөйүн чэрчитинэн ыытыллар тэрээһиннэргэ – Дмитрий Петрович Коркин аатынан өрөспүүбүлүкэтээҕи успуорт оскуола-интэринээтэ өрөмүөннэниэхтээх, Чурапчы сэлиэнньэтигэр Спортивнай уулусса учаастага аспаалланыахтаах. 

СӨ бырабыыталыстыбатын бэрэссэдээтэлэ Андрей Тарасенко от ыйын 31 күнүнээҕи мунньахха – хайысхаларынан эппиэттээх салайааччыларга бэлэмнэнии үлэлэрин түргэтэтэллэригэр сорудахтаата.

Бэйэ кэр.  

Санааҕын суруй

Бүтэһик сонуннар