Экчи 100 сыл анараа өттүгэр, ол эбэтэр 1923 сыл алтынньы 26 күнүгэр, Саха сирин киин толоруулаах кэмитиэтин 65 №-дээх бирикээһинэн Физическэй культура сэбиэтэ тэриллибитэ.
Бастакы сэбиэт састаабыгар бэрэссэдээтэлинэн – РКСМ уобаластааҕы кэмитиэтиттэн Израиль Калачик, чилиэннэринэн – Уобаластааҕы идэлээх сойуустан Яков Рабинович, военкоматтан Александр Столяров, Доруобуйа харыстабылын управлениетыттан Николай Гущин, Наркомпростан Федот Астраханцев, «Саха Омук» культурнай-сырдатар уопсастыбаттан Василий Леонтьев үлэлээбиттэрэ.
Ити курдук баартыйа, хомсомуол, идэлээх сойуус тэрилтэлэрин өйөбүлүнэн, Сэбиэт физкультура бастакы кэллэктииптэрин, успуорт араас көрүҥүнэн куруһуоктары тэрийэн саҕалаабыта. Чэпчэки атлетикаҕа, хайыһарга, бэлэсипиэт успуордугар, саахымакка аан маҥнайгы күрэхтэһиилэри тэрийбитэ.
Быйыл дойду уонна өрөспүүбүлүкэ үрдүнэн физкультурнай хамсааһын тэриллибитэ 100 сылын киэҥ далааһыннаахтык бэлиэтииллэр. Ил Дархан Айсен Николаев дьаһалынан, тэрийэр кэмитиэт уонна ыытыллар тэрээһин барыла олохтоммута.
Бүгүн Дьокуускайга Норуоттар икки ардыларынааҕы «Физкультурнай үөрэхтээһин: ис хоһооно, хайысхата, ньымата, тэрийиитэ» билим кэҥгириэһэ саҕаланар. Кэҥгириэс билим 12 хайысхатын тутуһан үлэлиэ. Эспиэрдэр физическэй культура уонна успуорт эйгэтигэр билим сайдыытын, ону кытары Арктика тыйыс усулуобуйатыгар киһи хамсанар кыаҕын нуормалааһын уратыларын ырытыахтара.
Маны сэргэ Арассыыйа устудьуоннарын успуордун сойууһун эспиэртиир сүбэтин мунньаҕа буолуоҕа. Оттон ахсынньы 13 – 15 күннэригэр Өрөспүүбүлүкэ физическэй культуратын уонна успуордун үлэһиттэрин сийиэһэ ыытыллыаҕа. Маны таһынан кинигэ бэчээттэниэҕэ уонна документальнай киинэ оҥоһуллан тахсыаҕа.
Саха сиригэр кэнники 5 сылга физкультуранан уонна успуордунан дьарыктанар 3-тэн 79-гар диэри саастаах дьон ахсаана элбээн иһэрин бэлиэтииллэр. 2018 сылга 38,91 % буоллаҕына, 2022 сылга 51 % буолбут.
Сонун төрдө: СӨ Бырабыыталыстыбатын уонна Ил Дарханын пресс-сулууспата
