“Саханефтегазсбыт” АУо үлэһитэ Полина Слободчикова дьиэ иһигэр 100 км хамаанданан сүүрүүгэ Арассыыйа чөмпүйэнээтин кыһыл көмүс мэтээлин ылла.
Арассыыйа чөмпүйэнээтин кыһыл көмүс мэтээлин хаһаайына дойдутугар кэлээтин кытта, “Саханефтегазсбыт” АУо генеральнай дириэктэрэ, СӨ норуодунай дьокутаата Виктор Лебедев эҕэрдэлээтэ. Виктор Николаевич чөмпүйүөҥҥэ өйдөбүнньүк бэлэх туттарда, 100 км сири 8 чаас 46 мүн. 15 сөк. тохтообокко түргэн тэтиминэн сүүрүү спортсментан күүстээх санааны, дьулууру, тулууру эрэйэрин бэлиэтээтэ. “Саханефтегазсбыт” АУо бүттүүнүн кэлэктиибэ кини үрдүк ситиһиитинэн киэн туттарын эттэ уонна инникитин ситиһиилэри баҕарда.
Полина Усмановна чэпчэки атлетикаҕа Арассыыйа успуордун маастарыгар хандьыдаат, “Саханефтегазсбыт” АУо былаан-экэниэмикэ отделыгар үлэлиир. Тохсунньу бүтүүтэ буолбут чөмпүйэнээккэ сыл устата нэдиэлэҕэ алта күн күүскэ дьарыктаммыт. Ааспыт сыл күһүнүгэр аан бастаан 100 км сүүрэн, РФ успуордун маастарыгар хандьыдаат нуорматын толорбут. Ол иһин, спортсмен бэйэтэ кэпсииринэн, чөмпүйэнээккэ, манеж иһигэр, 500 эргиири быдан чэпчэкитик, сэргэхтик сүүрбүт. Чөмпүйэнээккэ Саха сирин спортсменнарын сэргэ Курскай, Кировскай, Курганскай, Рязанскай, Белгородскай, Челябинскай уобаластар бэрэстэбиитэллэрэ кыттыбыттар.
Кыһыл көмүс мэтээллээх Полина Усмановна оҕо сылдьан хайыһарынан уонна чэпчэки атлетиканан дьарыктаммыт. Ыал буолан, оҕолонон баран, 2015 сылтан успуорка дьарыгын сөргүппүт. Маҥнай утаа нэдиэлэҕэ иккитэ сүүрэр эбит. 2019 сылтан күүскэ ылсан дьарыктанар буолбут. Талааннаах спортсмеҥҥа ситиһии күүттэрбэт, биир-биир сиэттиһэн кэлэн иһэр. Ол курдук, 2023 с. 3 уонна 5 км дистанцияҕа Саха сирин чөмпүйүөнүн аатын ылбыта. Маны таһынан эмиэ былырыын Өймөкөөҥҥө “Тымныы чыпчаала” кыһыҥҥы марафоҥҥа, “Забег РФ”, “Ледовый пробег” күрэхтэргэ 21,1 км дистанцияҕа муҥутуур кыайыылааҕынан ааттаммыта. Бэлиэтээн эттэххэ, Полина Усмановна ийэтэ – Сунтаар улууһуттан төрүттээх Варвара Григорьевна Макарова-Сүүрүк Балбаара чэпчэки атлетикаҕа өрөспүүбүлүкэҕэ биллэр сүүрүк.
– Сүрүн өйөбүлүм, көҕүлээччим – ийэм. Кини саҥа чыпчааллары дабайарбар, уустугу эрэллээхтик туоруурбар көмөлөһөр, сүбэ-ама буолар. Ийэм, төһө да сааһырдар, 80-с хаарын санныгар түһэрдэр, Өймөкөөҥҥө ыытыллыбыт “Тымныы чыпчаала” кыһыҥҥы марафоҥҥа 5 км 2-с миэстэни ылан турар, – диэн спортсмен ийэтин туһунан олус киэн туттан, истиҥник ахтан кэпсиир. Маны таһынан истиҥ махталын тириэньэрэ Василий Афанасьевич Спиридоновка уонна кинини мэлдьи өйүүр, өрүү итэҕэйэр “Саханефтегазсбыт” АУо-ҕа бииргэ үлэлиир кэллиэгэлэригэр тиэртэ.
