Киир

Киир

Олунньу 15 күнүгэр СӨ спортивнай тустуу федерациятын бастакы вице-бэрэсидьиэнэ, норуот дьокутаата Виктор Лебедев көҥүл тустууга өрөспүүбүлүкэ сүүмэрдэммит хамаандатын чилиэннэрин кытта көрүстэ. Көрсүһүү кэмигэр федерация аатыттан тохсунньу 24-29 күннэригэр Красноярскайга “Иван Ярыгин Куубага” норуоттар икки ардыларынааҕы көҥүл тустуу турнирын призёрдарыгар уонна кинилэр тириэньэрдэригэр харчынан бириэмийэлэри туттарда.

Чуолаан, Куубак боруонса мэтээлин хаһаайыннара Айсен Потаповка (70 к.), Никита Хабаровка (125 к.) уонна кинилэр тириэньэрдэрэ Артур Константиновка, Алексей Некрасовка, маны таһынан бастакы тириэньэрдэрэ  Виктор Ощепковка, Лаврентий Абрамовка.

СӨ Тустуу федерациятын бэрэсидьиэнэ Ил Дархан Айсен Николаев аатыттан бочуоттаах соругу толорон баран, Виктор Лебедев Саха сирин сүүмэрдэммит хамаандатын чилиэннэрин, тириэньэрдэри кытта сэһэргэстэ.

Ааттаах-суоллаах спорсменнартан биирдэстэрэ – көҥүл тустууга аан дойду икки төгүллээх, Арассыыйа алта төгүллээх чөмпүйүөнэ, Арассыыйа успуордун үтүөлээх маастара, билигин СӨ норуодунай дьокутаата, бөдөҥ стратегическай тэрилтэ салайааччыта улахан успуорка тус ситиһиитин, уопутун кэпсээтэ, үрдүк таһымнаах күөн күрэскэ эт-хаан, өй-санаа өттүнэн хайдах бэлэмнэнэри (күүстээх, дьаныардаах дьарыктан, аһылыктан, эрэсиими тутуһартан саҕалаан, өйү-санааны сааһылааһыҥҥа, бөҕөргөтүүгэ тиийэ) сүбэлээтэ.

– Бастатан туран, дьиссипилиинэ уонна сыал-сорук туруорунуу, кыайыыга дьулуһуу. Эһиэхэ манна, дойдугутугар, күүскэ дьарыктанарга, Арассыыйа, норуоттар икки ардыларынааҕы таһымнаах күрэхтэргэ инники буоларга усулуобуйа толору тэриллэр. Бэйэм кэммэр өрөспүүбүлүкэ, дойду таһыгар дьарыктанар кыахтаах этим, ол гынан баран сыал-сорук туруорунан өрүү манна, дойдубар эрчиллэр этим, куруутун дойдубуттан - Арассыыйа сүүмэрдэммит хамаандатын аатыттан кыттыбытым. Атын дойду легионера буолар уонна ол дойду аатыттан кыттар – чэпчэки суол. Дойдугар күүстээх сүүмэрдээһини, күөн күрэһи ааһар быдан уустук. Бэйэҥ дойдуҥ аатыттан киирсэн мэтээли ылар, төрөөбүт дойдугар ситиһиини аҕалар ордук суолталаах. Өрөспүүбүлүкэҕит, дойдугут иннигэр эппиэтинэстээххитин умнумаҥ. Эһигини итэҕэйэбит. Ол гынан баран идэтийбит спортсмен да буолбатаххытына, үүнэн-сайдан тахсан, дьоҥҥутугар-сэргэҕитигэр, дойдугутугар туһалаах, үтүө майгылаах, дьоһун дьон буоларгытыгар баҕарабыт. Кинигэни ааҕыҥ, өйгүтүн сайыннарыҥ, үөрэниҥ. Бу барыта тус олоххутугар, үлэҕитигэр-хамнаскытыгар наадалаах буолуоҕа, – диэн Виктор Лебедев бэлиэтээтэ

Бу күн Виктор Николаевич ыйытыыларга хоруйдаата уонна СӨ спортивнай тустууга федерацията Саха сирин сүүмэрдэммит хамаандатын чилиэннэрин, тириэньэрдэри мэлдьи өйүү туруоҕа диэн эрэннэрдэ.

Арассыыйа, Саха сирин үтүөлээх тириэньэрэ Василий Петрович Уваров Виктор Лебедев “Азия оҕолорун оонньууларыгар” хайдах бэлэмнэнэн улахан успуорка бастакы хардыылары оҥорбутун ахтан-санаан ааста:

– Оччолорго 15 саастааҕа, 46 киилэ этэ. Биир күн: “Мин Андреевы кыайыам!” – диэтэ. Уолчаан бэйэтигэр олус эрэллээҕин, хорсунун сөҕө санаабытым. Владислав Андреев оччолорго улахан дьоҥҥо 57 киилэҕэ тустара, норуоттар икки ардыларынааҕы таһымнаах улахан күрэхтэргэ кыттар биллэр спортсмен этэ. Ол да гыннар уолаттары бэлэмнэнии кэмигэр иккиэннэрин бииргэ туруоран туһуннардым. Виктор, чахчы, кыайда. Кини оннук күүстээх санаалаах! Успуорка мэлдьи инники күөҥҥэ сылдьара. Улахан сыал-сорук туруорунара уонна онтун хайаан да ситиһэр. Тоҕо диэтэххэ, бэйэтин харыстаммакка, түмүк туһугар үлэлиир.

Арассыыйа, Саха сирин үтүөлээх тириэньэрэ Будимир Григорьевич Яковлев эмиэ хас да түгэни аҕынна. Ол курдук, Виктор Лебедев күннэтэ киэһэ 9 чааска диэри, оннооҕор ахсынньы 31, тохсунньу 1 күннэригэр сарсыарда кытары дарыктанарын элбэхтик көрбүт

Саха сирин сүүмэрдэммит хамаандатын бырааһа Лидия Егоровна Аргунова эдэр чөмпүйүөн доруобуйатыгар, аһылыгар эппиэтинэстээх сыһыаннааҕын холобурдаата:

– Бэл, обургу сааһыгар ыччат сөбүлээн иһэр утаҕын -- кока-коланы -- испэт, фастфуд астарын сиэбэтэ. Тоҕо диэтэххэ, иҥэмтэлээх аһылык наадалааҕын өйдүүрэ. Мелатонин киэһэ 10 чаастан түүн 2 чааска эрэ диэри эккэ-хааҥҥа үөскүүрүн билэн, 10-тан хойутаабакка утуйара. Сарсыарда 6 чааска туран, биир күҥҥэ Чочур Мырааҥҥа 20-тэ тахсара. Итинник гынан хайалаах сиргэ дьарыктаныы усулуобуйатын бэйэтигэр тэринэрэ.

image 16 02 24 02 35 1

Сэргэх көрсүһүү түмүгэр эдэр спорстменнар Виктор Николаевич Лебедевкэ уонна спортивнай Тустуу федерациятын бэрэсидьиэнэ Айсен Сергеевич Николаевка өйөбүллэрин иһин махтаннылар уонна өрөспүүбүлүкэ, дойду чиэһин көмүскээн, үрдүк таһымнаах күрэхтэргэ саҥа чыпчааллары дабайарга эрэннэрдилэр.

               Яна БАЙГОЖАЕВА.